وەزارەتى ناوخۆ لەبارەى ناڕەزایەتییەکانى مامۆستایان و ئەو گرژیی و رێگرییانەى لە مامۆستایان دەکرێت دەڵێت: کۆمەڵێک کەس و لایەنن و دەیانەوێت سود لەم دەرفەتە وەربگرن.

هەواڵ:KNNC

وەزارەتى ناوخۆ لە بەیاننامەیەکدا دەڵێت: چەند رۆژێکە لە سنوری سلێمانی گردبونەوەی ژمارەیەک فەرمانبەر بەدیدەکرێت، داواکارییە رەواکانی فەرمانبەران و چین و توێژەکانی هەرێمی کوردستان هەمیشە لە خشتەی کارە لە پێشینەکانی حکومەتی هەرێمی کوردستاندان و لەو پێناوەش بە بەردەوامی لەگەڵ حکومەتی فیدراڵ لە بەغداد کار بۆ بەدیهاتنیان کراوە و تا رادەیەکی باش بەرەو پێشچون هەیە و  هەماهەنگی لەگەڵ بەغداد لە هەوڵی چارەسەرکردنی بابەتە هەڵواسراوەکانین.

وەزارەتەکە دەڵێت: ئەوەی جێگای هەڵوەستەیە، کۆمەلێک کەس و لایەنی دەرەکی و ناوخۆیی لە عێراق دەیانەوێت ئەم داواکارییانە بە کاربهێنن بۆ مەبەستی گوماناویی خۆیان و هەندێک لایەنی پاشکۆ، لایەنەکانی لە یاسا دەرچو ، پ. ک. ک  و کەسانی تر سود لەو دەرفەتە وەردەگرن.

دەڵێت: ئەو لایەنانە نیازیان هەیە  بۆ شێواندنی ئاسایشى ناوچەکانی تری هەرێم بەکاری بهێنن و بەمەش داواکارییە رەواکانی فەرمانبەران تێکەڵ بە مەرامەکانیان دەکەن  سەرباری رێزگرتن لە مافی خۆپیشاندان، هەر هەوڵێک بۆ تێکدانی ئاسایشی هەرێمی کوردستان رێگرییان لێدەکرێت و هەر هەوڵێک بەدەر لە یاسا و رێنماییەکان بێت رێگەی پێنادرێت.