سەرۆككۆماری عێراق، لەبارەی پرسی موچەی موچەخۆرانی هەرێمى کوردستان، سكاڵایەكی لەسەر سەرۆكوەزیران و وەزیری دارایی فیدراڵ تۆمار كرد، داواكارە پرۆسەی تەوتین بۆ موچەخۆرانی هەرێم جێبەجێ بكرێت.

هەواڵ:KNNC

هاوڕێ تۆفیق، لێپرسراوی پەیوەندییەكان لە سەرۆكایەتیی كۆماری عێراق، لە كۆنگرەیەكی رۆژنامەوانیدا رایگەیاند: سەرۆككۆماری عێراق، سكاڵایەكی لەسەر سەرۆك وەزیران و وەزیری دارایی لە دادگای فیدراڵی تۆمار كردوە، سكاڵاكەش بەهۆی دواكەوتنی دابەشكردنی موچەی موچەخۆرانی هەرێمی كوردستانەوە تۆمار كراوە.

رونیشى كردەوە: سكاڵاكە لە 20ی مانگی رابردو تۆمار كراوە، لەو ماوەیەدا چاوەڕوانی بڕیاری دادگا بون، ئاماژەی بەوەكرد: رۆژی 12ی ئەم مانگە دادگا بەسكاڵاكەدا دەچێتەوە و چاوەڕوانن دادگای فیدراڵی بڕیاری دەستوریی خۆی دەربكات.

لێپرسراوی پەیوەندییەكانی سەرۆكایەتیی كۆماری عێراق، وتیشی: داوایان لە دادگای فیدراڵی كردوە، فەرمانی وەلائی دەربكات بۆ خەرجكردنی موچەی موچەخۆرانی هەرێم بەشێوەیەكی بەردەوام و بێ دواكەوتن و بابەتە هونەرییەكان نەبنە هۆكاری دواخستنی موچە.