نوێترین توێژینەوە دەریخستوە كە خەوتن زیاتر لە 9 كاتژمێر لە شەو و رۆژێكدا ئەگەری خاوكردنەوەی كاری مێشك و دروستبونی خەمۆكیی لە كەسەكاندا زیاد دەكات.

تەندروستی:KNNC

بەپێی ئەو توێژینەوەیەی لە گۆڤاری (ئەلزایمەر ئاند دمێنشا) بڵاوكراوەتەوە زۆر خەوتن كاریگەریی هەیە لەسەر كەمبونەوەی توانا هەستپێكردن لە مرۆڤدا كەم دەكاتەوە.

ئەو توێژینەوەیە لەسەر زیاتر لە هەزار و 800 كەس ئەنجام دراوە كە تەمەنیان لەنێوان 27 بۆ 85 ساڵیدا بوە و تێیدا توێژینەوە لەسەر كاتی خەوتنی ئەو كەسانە و توانا مێشكییەكانیان كراوە.

توێژەران گەیشتونەتە ئەو ئەنجامەی كە ئەو كەسانەی زیاتر لە 9 كاتژمێر لە شەو و رۆژێكدا دەخەون توانای هەستەكانیان كەم دەبێتەوە هەروەها توشی كێشەی خەمۆكیی دەبن.

ئەوەش رونكراوەتەوە كە پێویستی خەوتن لە كەسێكەوە بۆ كەسێكی دیكە جیاوازە، بەڵام بەشێوەیەكی گشتی خەوتنی ئاسایی بۆ مرۆڤ لەنێوان 7 بۆ 9 كاتژمێردایە و نابێت لەوەندە زیاتر بێت.

هەروەك رێنماییش دراوە كە گرنگە كاتی خەوتن رێكبخرێت تا كەسەكان بتوانن پارێزگاری لە تەندروست هێشتنەوەی مێشكیان بكەن.