سوپای ئیسرائیل بە پێنج موشەک باڵەخانەیەکی نیشتەجێبونی لە ناوەڕاستی بەیروت کردە ئامانج و 27 قوربانی لێکەوتەوە.

هەواڵ:KNNC

ئاژانسی فەرمی لوبنان بڵاویکردوەتەوە، بەیانی ئەمڕۆ لوبنان بە کۆمەڵکوژییەکی ترسناک رۆژەکەی دەستپێکرد، چونکە فڕۆکە جەنگییەکانی ئیسرائیل بە پێنج موشەک باڵەخانەیەکی هەشت نهۆمییان لە شەقامی ئەلمەمون لە ناوچەی بەستا بەتەواوی خاپورکردوە و چەندین کوژراو و برینداری لێکەوتوەتەوە.

ئاماژەی بەوەشکردوە، تیمە فریاگوزارییەکان دەستیانکردوە بە لابردنی داروپەردوی باڵەخانەکە.

هاوکات، بەگوێرەی ئەو وێنانەی کە لەلایەن خزمەتگوزاری ڤیدیۆیی ئاژانس فرانس پرێسەوە پەخشکراون، هێرشەکەی ئەمڕۆی زیانی بە ژمارەیەک باڵەخانە گەیاندوە.

وەزارەتی تەندروستی لوبنان رایگەیاند، بەهۆی هێرشەکەی بەرەبەیانی ئەمڕۆی ئیسرائیلەوە بۆسەر باڵەخانەیەکی نیشتەجێبون، چوار کوژران و 23 برینداری لێکەوتەوە.

رۆژی هەینی، ئیسرائیل لە زنجیرەیەک هێرشدا چەند گەڕەکێکی لە باشوری بەیروت و دەوروبەری کردە ئامانج، ئەوەش دوای ئەو هۆشدارییانەی بۆ چۆڵکردنی باڵەخانەکان کە ژمارەیەکیان لە ناوچە قەرەباڵغەکانی نیشتەجێبون و بازرگانیدابون.