گەنجێک لە هیندستان دواى ئەوەى لەلایەن پزیشکانەوە گیانلەدەستدانى راگەیەنراوە؛ لەکاتى مەراسیمى سوتاندنى جەستەکەیدا هەستاوەتەوە و کەمتەرخەمى پزیشکەکانیش بە هۆکارى ئەم روداوە دادەنرێت.


هەمەڕەنگ:KNNC

ئاژانسى هەواڵى فرانس پرێس بڵاویکردوەتەوە؛ لە هیندستان گەنجێکى تەمەن 25 ساڵ کە تواناى بیستن و قسەکردنى نەبوە، رۆژى پێنجشەممە بەهۆى تێکچونى بارى تەندروستییەوە رەوانەى نەخۆشخانە کراوە لە نەخۆشخانەیەکى راجستان.

ئاماژە بۆ ئەوەکراوە کە لەگەڵ گەیاندنى بە نەخۆشخانە پزیشکەکان وتویانە کە دوچارى پەرکەم بوەتەوە و گیانلەدەستدانەکەیان پشتڕاستکردوەتەوە و جەستەکەیان رەوانەى سوتاندن کردوە کە رێگەیەکە لەو وڵاتە لەجێی بەخاکسپاردن لەلایەن بەشى زۆرى هاوڵاتییانى وڵاتەکەوە دەگیرێتەبەر.

لەگەڵ دەستکردن بە مەراسیمى سوتاندنى جەستەى ئەو گەنجە، راستەوخۆ دەستى بە جوڵە کردوە و ئەوکات بۆیان دەرکەوتوە کە لەژیاندا ماوە و رەوانەى نەخۆشخانە کراوەتەوە، ئاژانسى فرانس پرێسیش دەڵێت: بەهۆى ئەوەى پزیشکەکان لەکاتى خۆیدا پشکنینى تەواویان بۆ تەندروستى ئەو گەنجە نەکردوە، بۆیە دوچارى ئەو هەڵەیە بونەتەوە.

لەگەڵ ئەوەى جارێک لە مردن هەستایەوە و رەوانەى نەخۆشخانە کرایەوە، بەڵام گەنجەکە رۆژى هەینى و رۆژێک دواى روداوەکە گیانى لەدەستداوە و بەهۆشیەوە تا ئێستا 3 پزیشک لە کارەکانیان راگیراون و لێکۆڵینەوە لە دۆسیەکە دەستیپێکردوە.