ئاسایشی سلێمانی دەستی بەسەر زیاتر لە سێ تۆن ماددەی هۆشبەردا گرتوە و بەڕێوەبەری راگەیاندنی ئاسایشی هەرێمیش دەڵێت: بەراورد بە ساڵی (2023) بڕەكەی كەمی كردوە.

هەواڵ: (KNNC)

سەلام عەبدولقادر، لێپرسراوی راگەیاندنی بەڕێوبەرایەتی ئاسایشی ھەرێمی کوردستان بە (KNNC)ـی راگەیاند: ساڵی رابردو ئاسایشی سلێمانی توانیویەتی دەست بەسەر بڕی سێ تۆن و (24) كیلۆگرام ماددەی هۆشبەری جۆراوجۆردا بگرێت.

وتیشی: ئەمساڵ هەزار و (19) تۆمەتبار دەستگیركراون كە تەمەنیان لەنێوان (18 بۆ 64) ساڵدایە، لەنێوان تۆمەتبارەكاندا كچ و ژن بونی هەیە، هەروەها لەسەر كەیسی كارگەی ماددەی هۆشبەرەكە گەرمیان، پێنج كەسیان دەستگیركردوە كە نەتەوەی عەرەب و خەڵكی سوریا بون.


لێپرسراوی راگەیاندنی بەڕێوبەرایەتی ئاسایشی ھەرێمی کوردستان ئاماژەی بۆ ئەوەشكرد، لە ئەنجامی بەدواداچون و دەستگیركردنی بازرگانە ناوخۆیی و بیانییەكان بەراورد بە ساڵی (2023) هاوردە كردن و دەستبەسەردا گرتنی مادەی هۆشبەری كەمی كردوە.


سلێمانی - بەهار عەبدولكەریم