بەهۆی سکاڵایەکی مەلابەختیار، بڕیار نامیق رۆژنامەنوس و پەیامنێری کەی ئێن ئێن، چوە بەردەم دادگا، دوای گفتوگۆ، دادوەر دانیشتنەکەى دواخست بۆ مانگی داهاتو. 

هەواڵ: (KNNC)


ئەمڕۆ چوارشەممە، لەسەر سکاڵای حیکمەت محەممەد کەریم ناسراو بە مەلا بەختیار، ئەندامی پێشوی مەکتەبی سیاسی یەکێتی، بڕیار نامیق رۆژنامەنوس و پەیامنێری کەناڵی کەی ئێن ئێن ئامادەی بەردەم دادگاى کەتنی یەکی سلێمانی بو.


لە دانیشتنەکەی ئەمڕۆی دادگادا، دادوەر وتەکانی بڕیار نامیقی وەرگرت و دواتر بڕیاردرا دانیشتنەکە بۆ (27ـی 1ـی 2025) داهاتو دوا بخرێت.


سکاڵاکەی مەلا بەختیار کە ماوەی چوار ساڵە لە دژی رۆژنامەنوس بڕیار نامیق لە دادگا تۆمار کراوە، پەیوەستە بە تەشهیر و ناوزڕاندن لە کۆی پێنج بەرنامەی تەلەفزیۆنی کە سەرکردە و هاوخەباتەکانی مەلا بەختیار لەسەر کتێبی لەبری بیرەوەرییەکان، بەهەڵە و شێواندنی مێژویی ناویان بردوە.