لە (5)ی ئازاری ساڵی (1991) و (30) ساڵ پێش ئێستا، لە رانیەوە بە بەشداری سەرجەم چین و توێژە جیاوازەکان و بە پشتیوانی هێزی پێشمەرگە، راپەڕین دژی رژێمی بەعس دەستیپێکرد.

 

کورد پشتیوانی نێودەوڵەتی بەدەستهێنا

بەهۆی راپەڕینەوە، کورد پشتیوانیەکی نێودەوڵەتی بەدەستهێنا، کە بووە هۆی دروستبونی کیانێکی ئیداری و ناوچەیی لە باشوری کوردستان.

هەر دوای راپەڕین، یەکەم هەڵبژاردن لە ناوچە کوردستانییە ئازادکراوەکان ئەنجامدرا، دوای هەڵبژاردنەکان یەکەم خولی پەرلەمانی کوردستان و حکومەتی هەرێمی کوردستانی دروستبوو.

 

ئەندازیارەکەی راپەڕین

راپەڕین؛ ئەنجامی خەباتی جەماوەری گەلی باشوری کوردستان بوو، لە دوای دەیان ساڵ خەباتی سیاسی و چەکداری، راپەڕین لەلایەن نەوشیراون مستەفاوە وردەکاری و بەرنامەکانی ئامادەکرابوو.

نەوشیروان مستەفا، هەر لەیەكەم ساتەوەختی راپەڕین ‌و دوای كۆتاییهێنان بە دەسەڵاتی بەعس، سەرقاڵی داڕشتنی بناغەكانی دەوڵەتی هاوڵاتی ‌و دامەزراوەیی بوون بوو، هەنگاوی یەكەم هەوڵیاندا كەسە حیزبیەكان بە تەنها وڵات بەڕێوە نەبەن، بەڵكو كەسانی شارەزاو تەكنۆكرات بەشداری پێبكرێت بۆ بەگەڕخستنی دامودەزگاكان، ئەنجامدانی هەڵبژاردن و دامەزراندنی حكومەتێكی بەرپرسیار.

نەوشیروان مستەفا لە چاوپێکەوتنێکیدا سەبارەت بە راپەڕین دەڵێت، "ئێمە ساڵی (1991) راپەڕینمان کرد، گەنجێک کە لەدایکبوی (1991)ـە ئێستا مافی دەنگدانی ھەیە و پێویستی بەوە نیە ئێمە راپەڕینی پێ بفرۆشینەوە، ئەو گەنجە ئێستا پێویستی بە ژیانێکی خۆش، سەفەر، ژیانێکی شەرافەتمەندانەیەو ناکرێ ئێمە تەنھا باسی مێژووی بۆ بکەین، دەبێت ھەوڵی باشکردنی ژیانی بدەین".

نەوشیروان مستەفا باس لەوەش دەکات: "خەڵک هۆکاری سەرەکی سەرکەوتنی راپەڕین بوە. بەڵام بەرهەمی راپەڕین بۆ خاوەنە راستەقینەکەی نەبو کە خەڵکە". 1331 جار خوێندراوەتەوە