ئەم بێدەنگیە هەموومان دەخنکێنێت


کەمێک سەرنج بدەن.


گەنجیان لە مەملەکەتدا نەهێشت، هەزاران گەنج لەو ڕێگەی قاچاغ و ناو دەریایانەدا  خنکان و قرش خواردنی، دڵی هەزاران باوک قرچەی لێ هەستا، هەزاران دایک جەرگیان سوتا، کەس باکی نەبوو.


ئەخلاقی کۆمەڵگەیان تێکدا و قیەم و ڕێزیان لە نێوان کەسدا نەهێشت، تا کار گەیشتە ئەوەی بەشەق لە مامۆستایان هەڵدا و کچە مۆدێلیان گەیاندە کەشکەڵانی فەلەک و میدیایان کردە باشترین مینبەر بۆ گەیاندنی بە هەموان، کەس باکی نەبوو.


دەستیان خستە قوتی منداڵی سەر بێشکە و بە ڕۆژی نیوەڕۆ پارەی نەخۆشخانەکەنیان برد و دەیان خانەنشین لەسەرەی وەرگرتنی موچەدا سەریان نایەوە، پیاویان لە پیاوەتی خست، مادەی هۆشبەر و کوشتن و خۆکوشتینای کردە مۆدێل، کەس باکی نەبوو.


زیندانەکانیان پڕ کردوە لە دزی بچوک و دزی گەوەرەش بە ئاشکرا بەناوماندا پیاسەدەکات، ماڵمان داگیر دەکات، شارمان داگیر دەکات، شاخ و گرد و کۆڵانەکانمان دەکات بە ناوی خۆیەوە، ئۆپۆزسیۆنی ساختەیان کرد بە قورگی هەمووماندا و لەو ڕێگەیەوە هەموانیان بێدەنگ کرد، کەس باکی نەبوو.


ئەوان باکیان بە هیچ نییە و کەسیش باکی بە هیچ نییە، ئەمڕۆ نا سبەی، دێن و یەک یەک دەمانکەن بە (بەرد) بەری دروستکردنی ئاپارتمانەکانیان و منداڵەکانیشمان دەکەونە ژێر ڕەحمەتی منداڵەکانیانەوە.


جا گۆیژە چییە؟ ئەوان خۆمانیان وردخاش کردوە، ئەوان تەمەنی هەموومانیان بە فیڕۆداوە، ئەوان هیچ جوانییەکیان بۆ نەهێشتوین، ژیانیان لێ سەندوین، جا گۆیژە چییە؟