بۆ دو مانگ دەچێت، موچەی پێشمەرگە و ھێزەکانی ناوخۆ کراوەتە قوربانی ڕێکنەکەوتنی حکومەتی ھەرێم و بەغدا، ئەویش بەھۆی ئەوەی ھەرێمی کوردستان ئامادەنیە زانیاری تەواو لەسەر پێشمەرگە و ئەو ھێزانە، ڕادەستی ناوەند بکات، بۆیە حکومەتی بەغدا موچەکەیانی بارمتەگرتوە و ئامادەنیە وەک موچەی فەرمانبەرانی مەدەنی  بۆ ھەرێم بینێرێت.


پێشمەرگە لەوەتەی ھەیە توێژێکی قوربانیدەر بوە، لەسەردەمی خەباتی شاخ و پێش ڕاپەڕین پێشمەرگە ناوێکی پیرۆز بو، ھەمو کەسێک نەیدەتوانی بەو ئەرکە پیرۆزە ھەڵسێت. وەلی مخابن لە دوای ڕاپەرین ناوی پێشمەرگە پیرۆزی جارانی نەماوە.


لە دوای ڕاپەڕین، پێشمەرگەی ڕاستەقینە تێکەڵاوی پێشمەرگەی بندیوار کرا، بندیواری پێشمەرگە جیاوازە، ئەوان ئەو کەسە  نەبون کە وەک فەرمانبەر ئەرکیان نەدەبینی سەرە مانگان موچەی موفتیان وەردەگرت، بگرە پاسەوانی سەرۆک جاشەکانی جاران لە سەردەمی ئێستادا ئەرکی تازەیان پێسپێردرا و لە دیوەخانی پیاو ماقوڵانی حزب ناونوسکراون و ناویان لێنرا پێشمەرگە،  ئەوان کراونەتە بار بەسەر ئەو پێشمەرگانەی لە ئەرک دان و بە موچەیەکی کەم شەڕی تیرۆرستانی داعشیان کرد و وەک ھێزی پارێزەری کوردستان بەردوام ئەرکی قورسیان بینیوە.


جگە لە تێکەڵاوکردنی لیستی باش و جاش، بەرپرسانی ھەرێمی کوردستان زۆر جار موزایەدە بە ناوی پێشمەرگەوە دەکەن، بە خەڵک دەفرۆشنەوە کە ئەوان پێشمەرگەی جاران و ھەمیشە غەمی پێشمەرگەیان لە کۆڵ خۆیان ناوە، بەڵام کەس بەوە دوعایەیان ناڵێت ئامین.


پێشمەرگایەتی جاران جیاوازی نەدەکرد لە نێوانی بەرپرس و پێشمەرگە، ئەوان وەک یەک دەژیان، زۆربەی بەرپرسی جاران جلو بەرگیان جلی پێشمەرگە بو،  نانی بارەگایان دەخوارد، لەسەر سفرەی ماڵە دێھاتیەکان دەژیان، کەچی بەرپرسانی ئێستا کە گوناحە پێیان بڵێی پێشمەرگە، ئەوان  لە کۆشک و ڤێلاکان دەژین، سەیارەی گران بەھایان لە ژێرە، منداڵەکانیان لە زانکۆ گران بەھاکان دەخوێنن، خاوەنی ھەمو شتێکی ئەو ھەرێمەن،  بۆیە باکیان بە دواکەوتنی موچەی پێشمەرگە نیە، ئەگەر باکیان ھەبوایە ئەوانیان نەدەکردە بارمتەی خرابەکاریەکانی خۆیان.


شەست رۆ‌ژ بۆ دواکەوتنی موچەی پێشمەرگەیەک کە موچەکەی کەمترە لە ملیۆنێک دینار ماوەیەکی یەکجار زۆرە، بەتایبەت کە بەشێک لەو توێژە مەغدورە کرێچین و داھاتی دیکەیان نیە.


بۆ ئەوەی لەوە زیاتر پێشمەرگە موچەەیان نەکرێتە بارمتە، دەبێت پاکسازی لە لیستەکەیان بکرێت، باری قورسی ئەوانەی کە پێشمەرگە نین لەسەر ئەو لیستە نەھێلدرێت.


باس لە ھەبونی پێشمەرگەی پارچەکانی دیکەی کوردستان دەکرێت،  لەنێو لیستی پێشمەرگە، ئەوەشیان غەدرێکی دیکەیە لە ناوی پێشمەرگەی ڕاستەقینە، چونکە دڵنیا بن پێشمەرگەی ڕاستەقینەی پارچەکان، لێرە دەستگیرۆیی ناکرێن، بۆیە لە پەنای ئەو کێشەیەی ھەیە، نابێت پەلاماری پێشمەرگەی ڕاستەقینەی پارچەکانی دیکە بدرێت.

دواجار دەڵێین، ئەگەر پێشمەرگەی جاران بە خوێن قوربانی دەدا و گیانی خۆی دەکردە قوربانی ئازادی خاک و نیشتمان، ئەوا ئێستا پێشمەرگەی مولتەزیم و پابەند بەئەرکەکەی خۆی،  قوتی ژیانی خۆی و ماڵ و منداڵی کراوەتە نەبونی شەفافیەت لە لیستی پێشمەرگەی ڕاستەقینە، بۆیە قوربانی ئەوان بەردەوامە، بەڵام بە جیاوازی قۆناغەکە.