ئەمڕۆ 22 ساڵ تێپەڕ دەبێت بەسەر کەوتنی ڕژێمی بەعسی عێراق و کۆتاییھێنان بە دەسەڵاتی سەدام حوسێن.

هەواڵ:KNNC

لە ساڵی 2003 ئەمریکا بڕیاری داگیرکردنی عێراقی دا بەتۆمەتی بونی چەکی کیمیایی، ناوەکی و بایۆلۆجی، ناوی لێنا ڕزگارکردنی عێراق و لە 20ی ئازاری 2003، یەکەم بۆردومانی ئاسمانی بۆسەر عێراق دەست پێکرد.

لە 21ـی ئازار سەرەتای دەستپێکردنی "ئۆپەراسیۆنی رزگارکردنی عێراق" راگەیەندرا کە نزیکەی 150 هەزار سەربازی ئەمریکی و 40 هەزار سەربازی بەریتانیا ڕەوانەی عێراق کران بۆ دەستپێکردنی ئۆپەراسیۆنەکە.

لەدوای بۆردومانێکی زۆری بەشێک لە شارەکانی عێراق و بەکارهێنانی موشەکی کروز لە 25ی ئازاردا، ھەزاران سەربازی ھێزی پیادەی دەریایی گەیشتنە شاری ناسڕییە ناوەندی پارێزگای زیقار و وێڕای روبەڕوبەبونەوەی قورس لەلایەن ھێزە عێراقییەکانەوە، ھێزەکانی ئەمریکا بەرەو بەغدا پێشڕەوییان کرد.

لە حەوتی نیساندا، ھێزەکانی ئەمریکا گەیشتنە ناوەڕاستی بەغداد و دەستیان گرت بەسەر ژمارەیەک لە کۆشکەکانی کۆماریی،لە ٩ی نیساندا ھێزەکانی ئەمریکا چونە نێو "شاری سەدام" باکووری رۆژھەڵاتی بەغدای پایتەخت و بە تێکشکانی پەیکەرە برۆنزییەکەی سەدام حسێن زەنگی کەوتنی حکومەتی بەعس لێدرا.

لە دوای ئەو رێکەوتە، ھەردوو شاری کەرکوک و مووسڵ لەلایەن ھێزەکانی پێشمەرگەوە رزگارکران، بەڵام شاری تکریت ناوەندی پارێزگای سەڵاحەددین شوێنی لەدایکبوونی سەدام حوسێن لە 14ـی نیساندا کەوت.

بەپێی داتاکانی ھەردوو وەزارەتی بەرگریی ئەمریکا و بەریتانیا، 139 سەربازی ئەمریکا و 33 سەربازی بەریتانیا کوژران و زیاتر لە حەوت ھەزار و 300 مەدەنی عێراقی لەو جەنگەدا کوژران.