بەمەبەستى دەستبەسەرداگرتنى کێڵگەنەوتییەکانى کوڵەجۆى گەرمیان، هێزێکى حەشدى شەعبى
بەرەبەیانى ئەمڕۆ هاتنە سنورى گەرمیان، فەرماندەیەکى پێشمەرگەش دەڵێت: هێزەکە بێ
ئاگادارى سوپاى عێراق و هێزى پێشمەرگە هاتون و لە چەند کاتژمێرى داهاتو دەکشێتەوە.
عەقید بەختیار بێسەری، جێگری فەرماندەی لیوای پێنجی هێزی
پێشمەرگە لە گەرمیان بە
کەى ئێن ئێن،ى راگەیاند؛ لە چەند کاتژمێرى داهاتودا دۆخەکە ئارام دەبێتەوە و ئەو
هێزەى بە سەدان ئامێر و کەرەستەى سەربازییەوە هاتبونە سنورى گەرمیان دەستیان بە
کشانەوە کردوە.
ئاماژەى بۆ ئەوەشکرد کە فەرمانیان پێگەیشتوە کێشە و
روبەڕوبونەوە لەنێوان هێزەکانى پێشمەرگە و ئەو هێزەى حەشدى شەعبى دروست نەبێت تا
ئەوکاتەى هێزەکەیان بە تەواوەتى دەکشێتەوە.
ئەو فەرماندەیەى پێشمەرگە ئاماژەى بۆ ئەوەشکرد کە ئەو هێزە
چونەتەسەر کێڵگە نەوتییەکان و ویستویانە دەستى بەسەردابگرن، ئەم کارەشیان بێ
ئاگادارى سوپاى عێراق و هێزى پێشمەرگە ئەنجامداوە.
بەپێی زانیارییەکانى پەیامنێرى کەى ئێن ئێن، لە ئێستادا
هێزەکەى حەشدى شەعبى لە کێڵگەى قەمەر دەستیان بە کشانەوە کردوە.
455 جار خوێندراوەتەوە