ماوەی چوار مانگە بەدیاریکراوی دوای دەستپێکردنی جەنگی حەماس و ئیسرائیل، بنکە سەربازییەکانی ئەمەریکاو بەرژەوەندییەکانی لە عێراق و سوریاو ئەردەن، لەلایەن هێزە پرۆکسییەکانی ئێران، بەتایبەتی بەرەی مقاوەمەی ئیسلامی عێراقی دەکرێنە ئامانج.

لەنێو ئەو هێرشانەدا، کاریگەرترین هێرشیان، هێرشەکەی هەفتەی رابردو بو، بۆ سەر بنکەی سەربازی تەنەف و تاوەری ٢٢ لە ئەردەن، کە بوە هۆی کوژرانی سێ سەربازی ئەمەریکی و برینداربونی نزیکەی ٤٠ سەربازی دیکە.

دوابەداوای ئەو هێرشانە، هەمو جیهان چاوەڕوانی کاردانەوەی ئەمەریکا بو، بۆ ئەو هێرشانە، تەنانەت هەندێک بەرپرسی ئەمەریکی داوای ئەوەیان دەکرد کە لەبری هێزە وەکالەتەکانی ئێران لەناوچەکەدا، راستەوخۆ لەئێران بدرێت. بەڵام وەک چاوەڕوان کرا، لەگەڵ گەیشتنەوەی تەرمی سێ سەربازە کوژراوەکە بۆ سەر خاکی ئەمەریکا، راستەوخۆ ئەمەریکا دوای ٢٦ ساڵ، فرۆکەی بی وەن بی هێنایەوە ئاسمانی عێراق و سوریا، لەرێگەی ١٢٥ موشەک، بۆردومانی ٨٥ ئامانجی کرد، لەپارێزگای دێرەزوری سوریاو ناوچەی قائیم لەپارێزگای ئەنبار لەعێراق. زۆرینەی ئەو شوێنانەش کە بەئامانج گیران بریتی بون لە بنکەو بارەگاو کۆگای سەربازی هێزەکانی نزیک لەئێران لەعێراق و سوریادا.

لەئێستاشداو بەپێی ئامارە سەرەتاییەکان، دەرکەوتوە کە بەهۆی ئەو هێرشانەوە لە عێراق ١٦ کەس کوژراون و ٢٥ کەسی دیکەش برینداربون، لە سوریاش ٢٣ کەس کوژراون و دەیان کەسی دیکەش بریندار بون.

ئەوەی رویدا لەلایەن ئەمەریکاوە، وەک دەستپێک و سەرەتای هێرشەکان ناوبراوە، گوایا هێرشەکانیان لەداهاتودا بۆ سەر ئەو هێزانە بەردەوام دەبن، بەڵام لێکەوتەی هێرشەکانی ئەمجارە دەریدەخات، ئەوەی رویداوە بەشێک بوە لەکاردانەوەو چاو ترساندنی ئەو میلیشیایانەی کە هەفتەی رابردو هێرشیان کردە سەر سەربازانی ئەمەریکا لە بنکەی تەنەف. بەتایبەت کاتێک بایدن گوتی:ئازاری هەر ئەمەریکیەک بدەن، وەڵامتان دەدەینەوە. واتە ئەم هێرشە زیاتر کاردانەوە بوەو هەرکات هێرشی  دیکەی لەو جۆرەیان بکرێتە سەر بەو چەشنەو توندتر وەڵامیان دەدەنەوە. بە واتایەکی دیکە ئەم هێرشانە، لەناوەرۆکدا هێرشێک نەبوە بۆ کۆتایهێنانی یەکجارەکی بەچالاکی ئەو گروپ و میلیشیایانەی کە نزیکن لەئێرانەوە لەسەر خاکی سوریاو عێراق. بەڵکو زیاتر هێرشی کاردانەوەو چاوترساندن بون.

لەلایەکی دیکەوە، لەئەنجامی هێرشەکاندا ئەوە بیندرا، کە هیچ یەکێک لەو هێرشانەی ئەمەریکا، لەو ئاستەدا نەبون، کە ڕای گشتی و کۆمارییەکانی ئەمەریکا چاوەڕوانیان دەکردو بەتایبەت کە داوایان دەکرد بایدن هێرشێکی سنور بەرفراوان بکات و ئێرانیش بکاتە ئامانج. بەڵام ئەوەی لەهێرشەکاندا بیندرا، ئەوەبو نەک هێرش نەکرایە سەر ئێران و بەرژەوەندییەکانی، تەنانەت لەهیچ یەکێک لەو هێرشانەدا کەسانی یەکەمی گروپ و میلیشیاکانی نزیک لە ئێران یاخود فەرماندەکانی ئێران لەعێراق و سوریا، نەکراونەتە ئامانج و نەکوژراون. هەرچەندە سێنتکۆمی ئەمەریکا گوتی:هێرشەکانمان کردوەتە سەر فەیلەقی قودسی سوپای پاسداران لەعێراق و سوریا، بەڵام لێکەوتەی هێرشەکان واناڵێن، تەنانەت روانگەی سوری بۆ مافەکانی مرۆڤ دەڵێت: هیچ سەربازێکی سوپای پاسداران لەهێرشەکانی سورریادا نەکوژراون. تەنانەت روانگەی سوری دەڵێت: لەپاڵ کوژراو بریندارانی هێزە میلیشیاکانی نزیک لە ئێران، بەهۆی هێرشەکانەوە لە مەیادین و دێرەزور کوژراو بریندار لەڕیزی هاوڵاتیانی مەدەنیشدا تۆمار کراوە.

ئەوەی لەئێستاشدا چاوەڕوان دەکرێت ئەوەیە، کەپێدەچێت لەماوەی داهاتوشدا ئەمەریکا لەسەر ئەم جۆرە هێرشانەی لەم ئاستە دیاریکراوەدا دژی ئەو گروپ و میلیشیایانەی نزیک  لەئێران لەناوچەکەدا بەردەوام بێت، هاوشێوەی ئەو هێرشانەی ماوەی نزیکەی مانگێکە دژ بە حوسییەکانی یەمەن دەستیپێکردوە. بەڵام ئەوەی دەبیندرێت لەم هێرشانە ئەوەیە کە تائێستا ئەم هێرشانە نەچونەتە ئاستی بڕینەوەی پەنجەکانی ئێران لەناوچەکەدا، ئەوەشی لەنێوان ئەو گروپانەو ئەمەریکادا رودەدات تائێستا لەئاستی جەنگێکی کۆنتڕۆڵکراو کارو کاردانەوەدا تێپەڕی نەکردوە.

لێرەشدا ئەوەی پەیوەستە بە عێراقەوە ئەوەیە، کە حکومەتەکەی سودانی کەتوەتە نێو دو بەرداشەوە، لەلایەک ئەمەریکا داوای هەماهەنگی و رێوشوێنی لێدەکات دژ بەچالاکییەکانی ئەو گروپانە، لەلایەکی دیکەشەوە، بەشێک لەگروپەکانی حەشد لەنمونەی بزوتنەوەی نوجەباو حزبوڵای عێراق، بون بەبەشێک لەبەرەی مقاوەمەی دژ بەئەمەریکا. بۆیە لەهەر حاڵەتێکدا ئەگەری بەریەککەوتن و زیادبونی ئاڵۆزی لەنێوان هەرسێ لایەنەکەدا بوەتە پرسێکی کراوەو بێگومان توندبونەوەی ئەم ململانێیەش لەنێوان گروپەکانی نێو حەشد لەناوەوە دەرەوەی حکومەت لەلایەک و توندبونەوەی هێرشەکانی ئەو گروپانەو ئەمەریکا بۆ سەر یەکدی لەلایەکی دیکە، لەئاکامدا سەردەکێشێت بۆ تێوەگلانی کابینەکەی سودانی، کەپێدەچێت لەئەنجامدا ئەمەش بەسەر سودانی و لاوازبونی حکومەتەکەیدا بشكێتەوە.

دواجار ئەوەی لەئێستاشدا ئەمەریکا بەردەوامی پێدەدات، بەتایبەتی لەم هێرشانەی ئەم دوایەیدا بۆ سەر هێزە پرۆکسییەکانی ئێران لەناوچەکەدا، دەرخەری خواستی ئەو وڵاتەیە بۆ بەردەوامیدان بەململانێکانی بەرامبەر بەئێران لەرۆژهەڵاتی ناوەڕاستدا، بەتایبەت لەسنورێکی دیاریکراودا، بەو مەرجەی نەچێتە ئاستی پێکدادانی راستەوخۆ، بێگومان ئەمەش هەمان خواستی ئێرانە. هاوکات هەوڵێکیشە بۆ زیاتر هاتنە ناوەوەو بەهێزکردنی پێگەی خۆیی، بەرامبەر بەئێران، نەک هەنگاونان بۆ کشانەوەو بەجێهێشتنی عێراق و سوریا، وەک ئەوەی زۆرینەی سەرکردەکانی گروپ و هێزە میلیشیاکانی نزیک لەئێران داوای دەکەن و ئارەزوی بۆ دەخوازن.