بەهۆی زۆری ژمارەى تاوانبارانەوە لە زیندانەکانی بەریتانیا، قەیران دروستبوە و جێگە نەماوە بۆیە حکومەتی وڵاتەکە ناچار بوە بە دەرکردنى بڕیارێکى تایبەت و ئازادکردنى بەشێک لە تاوانباران.

 

هەواڵ:KNNC

 

پێگەى بی بی سی بەریتانی بڵاوی کردوەتەوە، ئەمڕۆ لە بەریتانیا و وێڵز بەهۆی زۆری ژمارەى سزادراوان و نەمانی جێگە لە زیندانەکاندا هەزار و 750 زیندانی ئازاد دەکرێن.

 

باسى لەوەش کردوە بڕیارەکە ئەو تاوانبارانە دەگرێتەوە کە سزای کەمتر لە پێنج ساڵ زیندانییان بەسەردا سەپێنراوە و لە 40%ی سزاکەیان  تەواو کردوە.

 

بەرپرسانی ئەو وڵاتە رایانگەیاندوە پلانەکە ئەو تاوانبارانە ناگرێتەوە کە بە تاوانی توندوتیژی زیندانی کراون و سزای لانیکەم چوار ساڵیان بەسەردا سەپێنراوە، لەگەڵ ئەوانەی تاوانبارانی سێکسی و دەستدرێژیکارانی ناوماڵن.

 

ئەم بڕیارە لە کاتێکدایە ژمارەی سزادراوان لە زیندانەکانی بەریتانیا و وێڵز هەفتەی رابردو گەیشتە 88 هەزار و 521 کەس، کە ئەم ژمارەیەش  بەرزترین ئاستییەتی لە مێژوی وڵاتەکەدا.

231 جار خوێندراوەتەوە