ئێوارەی دوێنێ بەزەنگێکی مۆبایلەکەی سەدر بۆ مالکی کۆی پرۆسە سیاسیە چەقبەستوەکە راچڵەکی
پەیوەندی پچراوی پانزە ساڵەی نێوان سەدر و مالکی بە بیست خولەک قسەکردن پێکنرایەوە و ئەمەش جارێکی تر ئەو حەقیقەتە پراگماتیکەیەی هێنایەوە ناو ئەندێشەمان کە لەسیاسەت هیچ شتێک نامومکین نیە.
سەدر کە بە جوڵە شۆکهێنەر و عەجیبەکانی ناسراوە، بەم هەنگاوەیشی شتێکی تازەی لەسروشتی کەسایەتی خۆی دەرنەبری و ئەوەی پێ وتین کەهەمیشە چاوەروانی ئەوە بکەن کەچاوەرێی ناکەن.
پێنج مانگی رێکە لەدوای دەرکەوتنی ئەنجامی هەڵبژاردنەکانەوە ، حکومەتی زۆرینەی نیشتمانی و نا بۆ حکومەتی شەرقی و غەربی کردبوە تایتڵی دوای هەر دانیشتن و کۆبونەوەیەکی، هەر بۆیە لەبیست خولەک قسەی تەلەفۆن هەموو ئەوانەی وەلانا و گرێکەی بەرەو کردنەوە برد.
سەدر بە هێنانی جەعفەر سەدری ئامۆزا و ژنبرای ، کە لە هەمانکاتدا کوڕی دامەزرێنەری حیزبی دەعوە و کۆنە پەرلەمانتاری دەعوەیە لەساڵی ٢٠١٠ جارێکی تر ئەوەی وتەوە کەحەنانە بەتویت یان پەیوەندیە تەلەفۆنەکان ئەم عیراقە دەسوڕێنێ.
دواجار؛ لەدوای کۆبونەوەی ئەمڕۆی چوارچێوەی هەماهەنگی و دواتر پەیوەندیکردنەوەی مالکی بەسەدرەوە و هەروەها لەدوای تویتەکەی قەیس خەزعەلی کەئاماژەکان بۆ کۆکبونی هەموانن لەسەر جەعفەر سەدر، ئیتر ماڵی شیعی وەک ماڵی سونە بەرەو کۆکردنەوە دەچن.
بەڵام تاکە ماڵێک کە بە پەرتەوازەی لەدوورەوە دەڕوانێ ماڵی کوردی یە، هەر بۆیە زیادە نیە ئەگەر بڵێین لەدوای مام جەلال و لەنەبوونی سەرکردەی ڕاستەقینەدا شتێک لەئەسڵدا و لەم عیراقەدا هەر بوونی نەماوە بەناوی ماڵی کوردی.
556 جار خوێندراوەتەوە