دەسەڵات‎، یان ئۆپۆزسیۆنی پەرش و بڵاو، ڕێگەچارە هێزی سێهەمە..

کورد و کێشە ڕەواکەی ماوەی 32 ساڵە ڕووبەڕووی واقعێکی دەسەڵاتداریی کۆپی کراوی سەدەکانی ڕابردوو بۆتەوە، کە جگە لەهەندێ ماکیاژی سەردەمیانە، هیچ گۆڕانکارییەکی جەوهەری بەسەردانەهاتووە.

‎لەنێوان ململانێی نادروستی دەسەڵاتی خێڵ و بنەماڵەکاندا ماف و ڕاستیەکان ڕەوایەتیان کاڵ بۆتەوە، بەشێوەیەک هەموو پیرۆزی و بەها و مافە سروشتی و مەدەنی و نەتەوایەتیەکانمان، کراونەتە قوربانی بەرژەوەندی خودی (حیزب و بنەماڵەکان) دەریایەک گەندەڵی بە یاساکراو سەپێنراوی هێناوەتەبوون.

‎سەرئەنجام باجەکەی کاڵبوونەوەی هەستی نیشتمانی و نەتەوایەتی و بێ ئومێدبوونە بەبنەما و چەمکی هاووڵاتی و پرۆسە دیموکراتیەکانە، هەندێجاریش تا ئاستی گاڵتە جاریش ڕۆشتووە. هێز و ڕێکخراوە سیاسیە ئۆپۆزسوێنەکانیش، لەم واقعە ناشازەدا، بەهۆیی وابەستەیی و پەرش و بڵاویان تەنها ڕۆڵی کۆمبارس و لە باشتیرین حاڵەتدا نوزەیەکی لاوازدەبن.

‎خەونی ڕابەر و کاریزما و ڕزگارکەر، یان ناچالاک دەکرێت، یان بەناچاری دەبێت ملکەچی ئەجندایەکی نانەتەوایی بکرێت...یان.

‎ئاستەمە لەم قوناغەدا ڕابەرێکی بێ نەوەی بێ بنەماڵەی، بێ گیرفانمان بۆدروست بێت ‎تا بنەماکانی دەسەڵاتێک بەهێز و خۆڕاگری نیشتمانیمان بۆدروست بکات. بەداخەوە، هێزە دەسەڵات بەدەستەکان وادیارە خۆسەپێن و بێباک و بەرژەوندخوازو وابەستەن و تائاستی ملهوڕی ڕۆشتوون.

‎هێزە ئۆپۆزسیون و ڕکەبەرەکانیشیان، سەرەڕای دابەشبوون بەسەر تورکیا و ئێران و زۆنی سەوز و زەردا، بەدەست دەیان کێشەی ناخۆیی و دارایی و اعلامی و ڕێکخراوەیی دەناڵێنن، ئەمە سەڕایی ئەوەی ڕەوتی پۆپۆلیستی باڵی بەسەر شیوازی ململانی و ووتارەکانیاندا کێشاوە. لەناو ئەم واقعە تاڵەدا، بە تەنیا و بە جیا جیا هیچ ئومێد و تروسکایەک نابەخشن، بەڵکو تەنیا ڕێگەی دروست، لەپێناو ڕزگارکردنی دۆخی پڕ مەترسی هەرێم و بەدەستهینانی هێزی مادی و مرۆیی بۆ ڕووبەڕوو بوونەوەیی فشارو مەترسیە جۆراوجۆرەکان؛ کۆبونەوە و کۆکردنەوەی هێزە نیشتمانی و نەتەوایەتی و چاکسازیخواز و دیموکرات و ئازادیخوازەکانە لەژێر بەرنامەو پلانکارێکی نیشتمانی و سەردەمیانەی سەربەخۆ و کوردانە و مرۆڤدوستانیە.

‎ئەگەر بارودۆخی نەخوازراو و پڕ مەترسی هەژماری من و هەژماری ئەو، بوون و نەبوونی مووچە و خزمەتگوزاری، هەڵبژاردن و دواخستنی، هەڕەشە و پلانە جدیەکانی ئەملا وئەولا و دووئیداریی و شەڕی ناوخۆ و ‎کوشتاری براکان و دەیان مەترسی تر کۆمان نەکاتەوە! پرسیارە جدیەکە ئەوەیە ئەی چی کۆمان دەکاتەوە؟