لە مێژوی دور و نزیکی پارت و رێکخراوە سیاسییەکانی کوردستان و ناوچەکە و جیهاندا، دەیان ئەزمونی نوچدان و گرمۆڵەبون و لەناوچون و هەستانەوە، هەریەکەیان هۆکارگەل و بنەمای تایبەت بە خۆیان هەیە.

‎بزوتنەوەی گۆڕان یەکێکە لەو ئەزمونە نوێیانە، کە شایستەی تێڕامان و لێکۆڵینەوەیە.

‎نزیکەی (3) ساڵە لە هەوڵی دوبارە خۆڕێکخستنەوە و بنیات نانەوەدایە، هەمو هێز و تواناکانی خۆی بۆ ئاشتکردنەوە و کۆکردنەوە و بەگەڕخستنەوە کاراکتەر و سەرکردە سەرەکییەکانی قۆناغی دروستبونی بو.

‎لە چوار گەڕی بەردەوامدا بۆ ئەم ساتەوەختەش، نەیتوانی سەرکەوتنێکی بەرچاو بەدەست بهێنێت ئەوەش هۆکارگەلێکی هەیە کە مەبەستی ئەم وتارەم نی یە.

‎سەرەڕای بونی تێڕوانینی تایبەتی بەندە، ئەندامی دەستەی یەکەم له گەڕی یەکەمدا بوم

‎لە ماوەیەکی تاڕادەیەک کورتدا لەگەڵ نزیکەی 80  سەرکردە و هەڵسوڕاوی سەرەکی کۆبونەوە و گفتۆگۆی دورودرێژ کراوە، هۆکار و  پێشنیاری جۆراوجۆر تەڕحکراوە، کە رای بەندە پۆلێن دەکرێت بەسەر هۆکاری خودی و بابەتی و رێکخراوەیدا، کە سودگەلێکی باشیان دەبو گەر وەک بەشێک لە بنەماکانی ژیانەوەی گۆڕان سودیان لێوەربگیرایە، بەڵام بەداخەوە ئەوگەڕە و گەڕەکانی تریش بێ دەرئەنجام مایەوە.

هۆکارەکان زۆرن و قسەی لەسەرکراون بە رای بەندە هۆکارێکی سەرەکیتری ئەگەر سەرەکیترین نەبێت، ئەوەیە کە وەک پارت و رێکخراوە تەقلیدییەکان مامەڵەمان لەگەڵ ئەم نوجدانە کردوە.

‎گۆڕان بزوتنەوە و رێکخراوێکی ئاسۆییە، ستونی نییە کە باشرین رێگریی دژی دێواندنی تاک بوە.

‎سەرکردەکانی رێکخەر و مونەسقی نێوان ئۆرگان و دامەزراوەکانی بون، ئەگەر پێچەوانەی ئەمە هەنگاو هەڵگیرابێت ئەوە پەیوەندی بە کوالێتییەوە هەیە نەک بە پەیڕەوەوە.(ئەمە لەم ساتەدا جێگای باسمان نییە)، بەواتایەکی تر شکست و سەرکەوتن پەیوەندی بە هەمو کاراکتەرەکانەوە هەیە.

‎ئەگەر ئێمە رێکخراوێکی ئاسۆیی بین، ناکرێت و ناگونجیت بە یاسا و رێسا و عەقڵییەتی پارت و رێکخراوە تەقلیدییە ستونییەکان، مامەڵە لەگەڵ دەرهاویشتەکاندا بکەین.

‎ئەم شێوازی بیرکردنەوە و هەوڵی چارەسەرە ئاڵنگاریی زیاتر و دابەشبونی زیاتری لەگەڵ خۆیدا هێناوە، سەرئەنجام لە هەرلایەکەوە بەدوای رزگارکەر و سوپەرماندا گەڕاوین کە جگە لە بەفیڕۆدانی کات و تواناکان هیچی تری لێ سەوز نەبوە؛ هۆکارەکەشی سادەیە، بە نەخشەیەکی هەڵە، بە ئاڕاستەیەکی هەڵەدا هەنگاو دەنێین راستیەکەی ئەوەیە ئێمە کێشەی دەنگدەر و دامەزراوە، رێکخراوەیی و بڕیارو جوڵەی سیاسیمان هەیە.

‎هەرگیز کێشەی وتار و بەرنامەی سیاسیمان نەبوە.

‎هەوڵدەدەم لە تێڕوانی خودی خۆمەوە بۆهەریەکێک لەم کێشانە شتێک بڵێم:

‎هەنگاوی یەکەم، ئاشتکردنەوەی دەنگدەران
گۆڕان بزوتنەوەیەکی دەنگدەرانە و بەتەها هێزی دەنگدەرانی بەدەستەوەیە، ئەوانیش ئێستا دردۆنگ و دودڵ و بێ متمانە و دورەوپەرێزن.

‎باشتر وایە بزوتنەوەى گۆڕان، هەمو ئۆرگان و هەڵسوڕاوەکانی بۆماوەی دو مانگ خۆیان تەرخان بکەن و دابەشبکرێن بەسەر سەدان گروپ و دەستەوە، لە هەمو شار و شارۆچکە و گەڕەک و گوند و کوچەیەکدا،  لە دەرگای هەمو ماڵ و دوکان و شوێن کارێک بدەن دڵ و گوێ و هۆش و دەرونیان بۆ خەڵک بکەنەوە، بپرسن گوێ بگرن؛  بزانن بۆ خەڵک دڕدۆنگ و دورەپەرێز و بێ متمانە بوە لە گۆڕان؟ داوای لێبوردن و بەخۆداچونەوە و راستکردنەوەی هەڵەکانی بدات رۆژانە دەستەکان راپۆرتەکانیان ئاڕاستەی ئۆرگانەکانیان بکەن هەمو گلەیی و گازندە و توڕەیی و بێ متمانەیی کۆبەند بکەن.

‎تەنها لە ماوەی مانگێکدا، بێ گوێدانە پلە و پۆست و مەکانەتەکان، بە لێکۆلێنەوەی وردەوە بڕیارە دروستەکان بدات.هەنگاوی یەکەمی بنیاتناوەی گۆڕان بنێت و کار بەو بنەمایە بکات، کە هەمیشە خەڵک لەسەر هەقن و داواکارییەکانیان رەوان.