سەرەرای ئەوەی لە دوای کۆچی دوایی نەوشیروان مستەفا، بزوتنەوەی گۆڕان دوچاری کۆمەڵێک هەڵەی ستراتیژی گەورە بویەوە و کاراکتەرەکانی ناو حزبەکە لە ناو حزبەکە یان حکومەت بە جۆرێک لە جۆرەکان لە ڕێڕەوی بنەما سەرەکییەکانی کەم تا زۆر لایاندا و پاشان ڕوبەڕوی دەیان ڕەخنەو هەڵەو کاری نەشیاو و هەلپەرسانە و پاشان روبەڕوی هێرشی جیا جیا بونەوە لە نێو دەنگدەرانی گۆران تا کار گەیشتە ئەوەی کە بزوتنەوەکە ڕێژەی دەنگەکانی بۆ خراپترین ئاست دابەزی، بەڵام هاوتەریب بە شکستەکانی گۆڕان بە پێی ئەزمونی ژیانی سیاسی و کۆمەڵایەتی کۆمەڵگەی کوردستانی باشوری سەردەمی دوای شکستی گۆڕان هەتاکو ئێستاکە، بەهیج شێوەیەک نەشوێنی بزوتنەوەی گۆڕان پڕ کرایەوە و نەهیچ هێزێکی سیاسی توانی بیرو بەرنامەو شوێن پێی بزوتنەوەی گۆران تێپەڕێنێت.

لە سەردەمی دوای بزوتنەوەی گۆرانەوە هیچ هێزێکی سیاسی ئۆپۆزسیۆنی ڕاستەقینە لە هەرێمی کوردستانا دروست نەبویەوە، شەقام و دەنگی ناڕازی کۆمەڵگای کوردی بە تەنها مایەوە و هیچ نوێنەرایەتییەکی سیاسی لە هیچ کام لە دەزگا جیا جیاکانی سیاسەت لە کوردستان نەبو، چەندین جار رویدایەوە کە شەقامی کوردی بەبێ پشت و پەنا مایەوەو لە ئەگەری ڕودانی هەمو چالاکییە ناڕەزایەتییەکان لە سەر شەقام هیچ هێزێک نەبو بە پاڵپشت و ڕێنیشاندەری ناڕەزایەتییەکان، بۆیە سەردەمی گەورەی نائومێدی سیاسی ڕوی لە کۆمەڵگاکە کرد و باشترین بەلگەش بۆ سەلمێنەری ئەمە بایکۆتی دەنگدان بوە لە لەلایەن دەنگدەرانی باشوری کوردستانەوە لە هەڵبژاردنەکانی ڕابردودا بە شێوەیەک ئەو بایکۆتی دەنگدانە لە مێژوی هەڵبژاردنی کوردستانا وێنەی نەبوە.

 هەرچەندە ئەوەی کە دەوترێت "هاوڵاتی متمانەی بە هیچ نەما"* بۆیە بایکۆتی هەڵبژاردن دەکات قسەیەکی تەواو دروست و واقع بینانەیە، ئەمەش واتە لە دوای گۆڕان هیچ هیزێکی سیاسی نەیتوانی متمانەی خەلکی نارازی باشوری کوردستان بۆ خۆی بباتەوە، لە دوای تێوەگلانی گۆڕان بە شکستێکی گەورە جارێکی تر دەنگدەری گۆڕان بە دەنگەکانی هیچ هێزێکی سیاسی نەکردەوە بە رابەری ئۆپۆزسیۆن، بە واتایەکی تر هەمو ئەوانەی لە قۆناغی گەشەی گۆڕاندا دەنگیان دایە گۆڕان، بەڵام لە قۆناغی شکستی گۆراندا متمانەیان نەدایەوە بە هیچ هێزێکی سیاسی و بایکۆتی دەنگدانیان کرد، واتە دەتوانین بێژین لە دوای کۆچی دوایی نەوشیروان مستەفا ڕابەری بزوتنەوەی گۆڕان جارێکی تر هیچ سەرکردەیەکی تر نەبوە مەترسی جدی لەسەر حکومڕانی یەکێتی و پارتی، بەڵام لەبەر ئەوەی سیستەمی حکومڕانی و سیاسەت لە کوردستان سیستەمێکە پڕێتی لە گەندەڵی دارایی و ئیداری و حزبە حکومڕانەکانی حزبانێکن جگە لەوەی تێوەگلاون لە جۆرە جیا جیاکانی گەندەڵی و ناشەفافی لە هەمان کاتدا متمانەی زۆرینەی هەرە زۆری کۆمەڵگاکەیان لە دەستداوەو زۆرینەی هەرە زۆر بە حزبی زۆرینەیان نابینن.

 لەم ڕوانگەوە تا چەنێ شەفافی بۆ کۆمەڵگای کوردی گرنگە، تا چەند دیموکراسی بۆ کۆمەڵگاکە گرنگە ئاواش بونی ئۆپۆزسیۆن بۆ کۆمەڵگای ئێمە گرنگە، کۆمەڵگایەک کە بە دەیەها جۆری جیاجیا حزبە حکومرانەکان خەریکی چەواشکردنین، خەریکی خنکاندن و گەوجاندنین، بێگومان لە وەها کۆمەڵگایەکدا بونی ئەگەری هێزێکی بەهێزی ئۆپۆزسیۆن لە هەمو ئەگەرێکی تر گرنگترە، بزوتنەوەی گۆران خاوەنی پاشخانێکی گەورەی ڕەمزییە بۆ نوێنەرایەتی کردنی دەنگی ناڕازی کۆمەڵگاکە، گۆران خاوەنی ژمارەیەکی زۆری کادیری خاوەن بیرو ئازا و قوربانیدەرن بۆ رابەرایەتی کردنی دەنگی ناڕازی و ئۆپۆزسیۆن، گۆران خاوەنی ژمارەیەکی زۆر سەرکردەی خاوەن ئەزمونە و ئازان کە هۆکارێکی گەورەن بۆ گیڕانەوەی ڕۆڵ بۆ ئۆپۆزسیۆن و شەقام، گۆڕان خاوەن سەرمایەیەکی زۆری مرۆییە کە دەتوانن ببنە ڕابەری دەنگی ناڕازی لە کۆمەڵگای کوردی، لە ڕاستیدا بۆ ئەوەی لە داهاتودا ئۆپۆزسیۆنی بەهێزبونی هەبێت پێویستە گۆران بەهێز بێتەوە.