دوێنێ دو بەڕێز لە  پەرلەمانتارانی DEM پارتی سەردانی سەرۆکی پارتی کرێکارانیان کرد لە زیندانی ئیمراڵی  و دوای پێنج کاتژمێر کۆبونەوە بەیاننامەیەکیان بڵاوکردەوە بۆ رایگشتی، سەرۆکی  پ ک ک بەڕیز ئۆجئالان زیاتر لە 25 ساڵە لە دورگەی ئیمراڵی زیندانی تاکەکەسیە و بێگومان بونی ئەو لە زیندان و شێوازی فڕاندنەکەی هێشتاش لەسەر دڵی ملیۆنان کورد ئازار دروستدەکات.

لەم نوسینەی خوارەوەدا بەچەند خاڵێک سەرنجم سەبارەت بە کرۆکی پەیامەکە دەخەمەڕو، هیوادارم بتوانم لێرەدا مەزنی ئاپۆ و گەورەیی بیرکردنەوەی ستراتیژی و زیرەکی سیاسی ئەو دەربخەم.

یەکەم : پێداگرتن لەسەر برایەتی کورد و تورک.  لەمڕێگەیەوە بەڕێز ئۆجئالان بە شۆڤینی و نەتەوەچی و تەنانەت فاشیستەکانی توکیا ئەڵێت: کە بە سزاندانی ئەو بە 25 ساڵ و کوشتنی هەزاران هەزار کەس لە گەلەکەی نەیانتوانیوە توڕەی بکەن و پرەنسیپەکانی پێ بگۆڕن.

دەڵێت:  من هەر ئاپۆکەی جارانم جا چەپی لینینی ناودەنێن یان مرۆڤدۆستێکی بوکچینی ئەمریکایی، گرنگ نیە. گرنگ ئەوەیە پەیامی ئۆجئالان هەمان پەیامی سەرەتایە: بەڵێ بۆ برایەتی گەلان، نەخێر بۆ ستەم و دەوڵەتی تواندنەوەی نەتەوەیی. بێگومان ئەم خاڵە کە لە سەرەتای پەیامەکەدا هاتوە تاقمی دەسەڵاتداری تورکیا دەخاتە بەردەم ئیحراجیەکی سامناک کە دەبینن رەهبەری گەورەی کورد دوای چارەکە سەدەیەک هیچ تورەیی پێوە دیار نییە.

هەر لەم خاڵەدا جێی خۆیەتی باس لەو بڕگەیەی بەیانەکە بکەین کە باس لەوە دەکات تەندروستی بەڕێز ئۆجئالان زۆرباشە و ورەی بەرزە.

ئەو خاڵە هێندەی هەمو خاڵەکان بایەخی هەیە بۆ کۆی گەلی کورد  و ناحەزەکانیشی، چونکە ئەگەر ئاپۆ دۆخی تەندروستی باش نەبێت بێگومان ناتوانێت رەهبەری بکات، بۆ نوخبەی تورکیش زۆر مانادارە، چونکە ئەوان دەزانن، لە عورفی عوسمانیدا، گەر سوڵتانێک یان کوڕە سوڵتانێک تەندروستی باش نەبێت مانای وایە بۆ کاری سیاسەت و حوکمڕانی دەسنادات و هەربۆیەش سوڵتانەکانی عوسمانی لە مەودای 600 ساڵەی دەسەڵاتیاندا، ئەگەر بێچوە سوڵتانێک شانسی هەبوایە و نەکوژارایە، بە ئەنقەست نوقسان دەکرا جا بە کوێرکردن بوایە یان پەنجە قرتاندن یان هەر شێوەیەک کە بەڵگەبێت بۆ ناتەواوی.

پەیامەکە بە نوخبەی دەسەڵاتداری توکیا دەڵێت: عەبدوڵا ئوجئالان دوای 25 ساڵ زیندانی تاکەکەسی هێشتاش ساخ و سارحاڵ و بەورەیە. واتە: ئامادەیە بۆ روبەڕوبونەوە و ئاڵنگاریی.

دوەم: خاڵی دوەم پێ لەسەر ئەوە دادەگرێت کە "گرنگە هەمو بازنە سیاسیەکان لە تورکیا لە سەروی حساباتی تەسک و کورتمەودا بیربکەنەوە" ئەم بڕگەیە سەرباری ئەوەی کە ئامۆژگاری راستەوخۆیە بۆ ئەردۆغان و "بازنە" شۆفێنیەکەی دەوروبەری، ئامۆژگاریشە بۆ مەهەپە و تەنانەت گورگە بۆرەکانیش و پێیان دەڵێت: ئیتر بەسە واز لەم عەقڵیەتی خۆسەپێنیە بهێنن، چونکە تیا سەرکەوتو نابن. پێیان دەڵێت" بەهێزکردنی برایەتی تورک و کورد لە نوێوە نەک هەر بەرپرسیارەتییەکی مێژوییە، بەڵکو پرسێکی گرنگ و چارەنوسسازە بۆ کۆی گەلان"

جەختکردنەوەی بەیانەکە لەسەر "کۆی گەلان" ئاماژەیە بۆ ئەوەی گەر بێتو ئێمە لە چوارچێوەی تورکیادا پێک نەیەین بەدڵنیایێەوە گەلانی تریش بەهۆی ئێمەوە توشی گرفت و سەرئێشە دەبن.

جەختکردنی ئاپۆ لەوەی کە" بێگومان یەکێک لە گرنگترین پلاتفۆرمەکان بۆ ئەو بەشداریە ( واتە بەشداری لە چارەسەری) پەرلەمانی تورکیایە"، دەرهێنانی بەڕەی گفتوگۆی نهێنی و واتەواتی میدیاییە لەبن دەستی دەزگا مخابەراتییەکان و پیاوەکانیانە و بردنیەتی بۆ بەردەم نوێنەرانی گەل: ئەوە نوێنەرانی گەلانی تورکیان کە دەتوانن راستەوخۆ بڕیار لە چارەنوسی ئاشتی بدەن نەک سەرۆککۆمار و سەرۆک حیزب و دەستە و تاقم و بازنە داخراوەکانی دەوربەریان. بەم بڕگەیە ئاپۆ بواری گەمەی ساڵانی 2014 و دواتری لەبەردەم دەسەڵاتی توکیادا داخست کە هەر لەو ساڵانە و ساڵانی پێشوتریشدا، بە حساب لە کاتی گفتوگۆی نهێنیدا، هەزاران کەسیان لە کاتی کشانەوەی گەریلادا کوشت و چەندین زەربەیان لە هێزی پاراستنی گەل وەشاند.

سێهەم: راگەیاندنەکە دەڵێت" روداوەکانی غەززە و سوریا نیشانیداوە کە چارەسەری ئەم پرسە، کە لە لایەن دەستێوەدانە دەرەکییەکانەوە سەختترکراوە چیتر نابێت دوابخرێت، بەشداریی و پێشنیازەکانی ئۆپۆزسیۆن هەروەها گرنگن  بۆ ئەوەی..."

خاڵ بەخاڵی ئەم راگەیاندنە داهێنانی سیاسییە و خۆزگە گەلی ئێمە بیتوانیایە باشتر لەم رێبەرە تێبگات و ئەندێشەی بخوێنێتەوە.

مەبەست لە روداوەکانی غەززە و سوریا مایەپوچی دو مۆدێلە لە کاری سیاسی و حوکمڕانی کە هەردوکیان شکستیان خوارد. مۆدێلی رادیکالیزمی ئیسلامی (غەززە) و ناسیونالیزمی تۆتالیتاری عەرەبی (سوریا)... هەردوک ئەم خەسڵەتانە لە دامودەزگای توکیادا برەویان هەیە و کاریان پێدەکرێت، ئەردۆغان و حیزبەکەی بەهۆی ریکلامی ئیسلامی و رادیکالیزمی دژە جو و دژە خۆرئاوا دەنگەکانی مسۆگەر دەکردەوە و لە هەمانکاتدا بۆ چەسپاندنی هەژمونی و ئۆتۆریتەی بەسەر کۆی دەزگاکانی دەوڵەتدا لەگەڵ باڵی ناسیۆنالیستی شۆڤێنی دژە کوردی وەک مەهەپەش هاوپەیمانی گرێدا و بیست ساڵی بەم جۆرە لە حوکم تێپەڕاند: ئاپۆ رایدەگەیەنێت کە ئیتر ئەو دو مۆدێلەش بەسەر چون.. بەڵام لە هەمان کاتدا ئاگادارە کە پارتی ئۆپۆزیسۆن لەم چەن ساڵەدا قسەیان گۆڕاوە و هەست بە هێزی کورد دەکەن بۆیە لێێ زیاد کردوە و ئامۆژگارییەکەی تەواو دەکات و دەڵێت" بەشداری و پێشنیازەکانی ئۆپۆزسیۆن" گرنگن. بەڵێ  .. بێگومان بێ پرسکردن و بەشداری جەهەپ کورد ناتوانێ لە تورکیادا دەسکەوتی گەورەی هەبێت.

بیرمان نەچێت لە بڕگەکەدا ئاماژە بەوەش کراوە کە" ئەم پرسە کە لەلایەن دەستێوەردانە دەرەکییەکانەوە سەختکراوە چیتر نابێت دوابخرێت"... رەنگە ئەم دێڕە چەند مانایەک لە خۆیدا هەڵبگرێت، بەڵام دەشێ گرنگترینیان ئەوەبێت کە بە ئەردۆغان و نوخبەی ناسیۆنال شۆڤینی تورک دەڵێت: ئێوە لە کۆی گەمەکەدا خەریکە بەرەو دۆڕان دەچن، لەگەڵ ئەمریکاش وەزعتان باش نیە و مانگی هەنگوینیتان دەمێکە بەسەرچوە.. باشترە گوێ لە لۆجیکی عەقڵ بگرن.

چوارەم: بڕگەی سێهەم دەڵێت" من خاوەنی ئەو توانا پێویست و بە بڕیارەم بۆ بەشداریکردنی ئەرێنیانە بۆ ئەو پارادیمە نوێیەی لە لایەن بەڕێز باخچەلی و بەڕێز ئەردۆغانەوە پشتیوانی لێدەکرێت".
بەڕێز ئاپۆ ئیتر لێرەدا "تەرەف"نییە ! وەک سەرۆکی پارتێکی سیاسی قاچاغ نادوێت، وەک زیندانیەک نادوێت کە منەتی کەسێک هەڵگرێت بۆ دەربازبون..  ئەو لێرەدا ئەوپەڕی رێز لە ناحەزەکانی و دوژمنەسەرسەختەکانی دیموکراسی دەگرێت و بە مۆراڵێکی بەرزی کوردانەوە، بە ئەخلاقی سەرکردەیەک کە بون و نەبونی خۆی دەمێکە لا بوەتە بابەتێکی پەراوێزی، وەک "دادوەر " دێتە مەیدان و خۆی نیشان دەدات، وەک دادوەرێک  نا  کە حەز بکات تێچێن بۆ  بابەتێکی یاسایی یان سیاسی بکات، بەڵکو بۆ  چارەسەری گرفت و بابەتێکی هەستیار کە بەڕێزان "باخچەلی" و "ئەردۆغان" هێناویانەتە بەرباس!.

واتە:  ئەوە من نیم کە داوام کردوە ئاشتی بکەین ( ئاشکرایە گەر دەوڵەت لە ئاشتی بوایە لانیکەم هەر بە یاسا دەبو ئێستا ئەو ئازاد بوایە) بەڵکو ئەوە بەڕێزان باخچەلی و ئەردۆغانن داوای دەکەن و رێز لە داواکەیان دەگرم! هەڵبەت راستەوخۆ پشتیوانی ئەو دو بەڕێزە ناکات و رستەکە زۆر وردتر و مانادارترە: ئەڵێت"  ئامادەم بۆ بەشداریکردنی ئەرێنیانە  بۆ ئەو پارادیمە نوێیەی کە لە لایەن باخچەلی و ئەردۆغانەوە پشتیوانی دەکرێت" .. بە واتایەکی تر، خودی پرۆسەکەش ئازایەتی و قارەمانێتی ئەو دو بەڕێزە نییە کە گوایە داوای ئاشتی دەکرێت، بەڵکو  حاڵەتێک، دۆخێک، پارادایمێک هاتوەتە ئاراوە کە ئەوانیش پشتیوانی لێدەکەن! ..ئیتر ئەو پارادایم و دۆخە سیاسیە چۆنە و لە کوێوە سەریهاڵداوە دەبێ لە مەیدانی شەڕەکان و هێزی کوردی خۆرئاوا و باشور و باکور و خۆرهەڵاتدا بۆی بگەڕێیی نەک لە قاموسی سیاسی دیپلۆماسی عوسمانیدا.

دەکرێت زۆر شتی تر سەبارەت بە بەیانەکەی ئیمراڵی بوترێت و بنوسرێت، بەڕای من ئەم راگەیاندنەی لەڕێی پەروین بوڵدان و سیری سورەیاوە گەیشتە جیهان، سەرەنجامەکەی هەرچیەک بێت، لوتکەی عەقڵانیەت و سیاسەتی تیا بەکار هاتوە و دەسەڵاتدارانی تورکیا بەرپرسن لە هەر ئاکامێکی خراپ کە لێێ بەرهەم بێت.