بزوتنەوەی گۆڕان بەرلەوەی رێکخراوێکی سیاسی تەقلیدی بێ، بیرکردنەوەیەکی لۆژیکی و عەقلانییە لە چوارچێوەی پڕۆژەیەکی فرە رەهەندا، بۆ تێپەڕاندنی  مێژوی ژێردەستی و روکردنە ئاسۆیەکی روناکتر و پڕ لە ئومێد و هیوا بۆ ئێستا و داهاتوی خۆمان و نەوەکانی داهاتومان.

پڕۆژە سەرەکیەکەی بزوتنەوەی گۆڕان لەسەر چەند کۆڵەکەیەک بنیاتنراوە، لێرەدا و بۆ ئێستای واقیعی خۆمان ئەم کۆڵەکانە گرنگن.

یەکەم: ریفۆرم لە هەمو کایەکانی کۆمەڵگادا.
دوەم: دژایەتی هەمو شێوە و مۆدێلەکانی گەندەڵی .
سێیەم: شەفافیەت لە داهاتی حکومەت و پەسەندکردنی بودجەی ساڵانەی کابینەکانی حکومەت.
چوارەم: خزمەتگوزاری و دانانی هاوڵاتییان وەک چەقی قورسایی حکومەتی رەشید و خاوەن کارنامە.

پڕۆژەی بزوتنەوەی گۆڕان لە ئەزمونی مێژوی میلەتان  ئیلهامی وەرگرتوە، هاوکات رەنگدانەوەی داخوازی لە مێژینەی خەڵک و خەوبینینی هەمومانە، بۆ ژیانێکی ئازاد و عەدالەتی کۆمەڵایەتی و بەشداری هەموان بۆ سود و قازانجی هەموان.

بزوتنەوەی گۆڕان نە بە هاشوهوشی پۆپۆلیست و نە بە پلان و سیناریۆی ئەم دەزگا و ئەو ناوەندی یاریپێکراو لەناو ئەچێ..!

بزوتنەوەی گۆڕان رەنگە لە رابردودا لە شەڕی  بچوک و موزایەدەی کەمنرخ و هاژوهوژی میدیایی چەواشکاری هەرزان نرخدا دۆڕابێ..! ئەگەر شەڕیشی دۆڕاندبێ ئەوا بە دڵنیاییەوە جەنگە مەزنەکەی بردۆتەوە..!

جەنگە مەزنەکە بەمانای شەڕی بەردەوام لە پێناوی مافەکانی هاوڵاتییان و بەهێزکردنی هۆشیاری و ئاگایی خەڵک بەرامبەر ماف و ئەرکەکانیان. ململانێی گەورەی جەنگە گەورەکەی گۆڕان لەسەر کۆی سیستەمی حوکمڕانی و بونی دەستورێکی شارستانییە،  کە سەروەریی یاسا و گێڕانەوەی شکۆی کوردبون و ئینسانی بونمان مسۆگەر بکات.

ئێستا هەمو هێزە سیاسییە خاوەن میلیشاکان بە هێزە تازە کانیشەوە، دروست  تێکڕایان کارنامە و بەرنامەکانیان کۆپی-پەیستی گوتار و پلاتفۆرمەکانی بزوتنەوەی گۆڕانە لە رابردودا..! تا ئێستا  مۆدێلی خەباتی مەدەنیانەی گۆڕانیان  تێنەپەڕاندوە.!

دەنگدەری بەڕێز…  ئازادە دەنگ و متمانەی بە چ لیست و کاندیدێک دەبەخشێ.  رۆژگارێک دەنگدەران سزای بزوتنەوەی گۆڕانیان دا. بەڵام رەوشی ژیان و گوزەرانیان خراپتر بو..! بۆئەوەی ژیان و گوزەرانی خەڵک ئەم رەوشە پڕ قەیراناویە تێپەڕێنێ و بەدەنگ و متمانەی ئێوە  گۆڕان بەهێز بکەینەوە، رێگای راست و دروست بۆ گێڕانەوەی شکۆ و مافە سەرەتاییەکانمان ئەوەیە ئەم جارە دەنگ و متمانەمان بدەین بە لیستەکەی گۆڕان. بۆ ئەوەی هەمومان پێکەوە شەڕی گێڕانەوەی شکۆ بۆ پەرلەمان و جێبەجێکردنی پڕۆژە خزمەتگوزاریەکان بکەینە ئەجێندای سەرەکیمان . پێویستمان بە بونی فراکسیۆنێکی کارا و چالاک لە پەرلەمان هەیە.

فراکسیۆنێک کە پارێزەری راستەقینەی ماف و داواکاری و داخوازیەکانی خەڵک بێت. بۆیە  دەنگدان بە گۆڕان گرنگە ، چونکە دەنگەکانی ئێمە هێز دەداتەوە بە گۆڕان تا لە هەورازی سەختی خەباتی مەدەنیدا ، رو لە ئامانجی سەرەکی  هەنگاوی دروست بنێ. لە قۆناغی سەرەتادا، هەمو ماف و خزمەتگوزاری هاوڵاتییان بەدور لە ئینتمای حیزبی و دینی و ئێتنی و بنەماڵەیی و ئایدۆلۆژی  بەدەستبهێنێ..!

بزوتنەوەی گۆڕان هێزێکە لە قوڵایی ئازار و نەهامەتی و موعاناتی خەڵکەوە دروست بوە.. دەنگی پێبدەن دەنگەکانتان دەبێتە تروسکەی ئەو هیوایەی کە دڕ بە شەوەزەنگی تاریکی دەدات. دەنگەکانتان پاڵپشتی گۆڕان دەبێ بۆ شەڕی هەژاری و جەهل .! ئەگەریش سزای دەدەن و  بە فریوی درۆزن و بەرژەوەندخواز و رابردو تەڵخ دەنگی پێنادەدەن..! دڵنیا بن رۆژگاری داهاتومان هەرگیز باشتر نابێ لە ئێستا و رابردومان.

درەنگ یا زو کۆمەڵگای ئێمەش رو لە ژیانێکی باشتر و هۆشیار لە روداوە سیاسی و بەئاگا لە هۆکارە بنەڕەتیەکانی قەیرانە راستەقینە و دروستکراوەکان  هەنگاو دەنێ… لە بوونی هێزێکی وەک بزوتنەوەی گۆڕاندا کۆمەڵگای کوردەواری بڕوای بە ژیاندۆستی و هیوای بە ئایندە بەهێزتر دەبێ..! سەرچاوەی مرۆیی ئێمە دەوڵەمەندو چالاکە.. بزوتنەوەی گۆڕان لە هەمو زروف و زەمەنێکدا دەبێتە هەوێن و دینەمۆی ئەو هیوا بەهێزە بۆ بەدەستهێنانی ژیانێکی شایستەتر لەم مەرگەساتەی ئێستاى.

 بەهێزبونی بزوتنەوەی گۆڕان واتا بەهێزبونی هیوا بەداهاتویەکی پڕ لە ئومێد و ژیانێکی شایستە.

بە قەولی جۆن میلتۆن: “هیوا لە جێی خۆیەوە دەتوانێ بەهەشتێک لە جەهەنەم و نەبونیشی جەهەنەمێک لە بەهەشت دروست بکات.”

 فریادڕەسی ئێستای ئێمە بۆ رزگاربون لەو هەمو غەوغا و قەیرانە هەمەجۆرانە بزوتنەوەی گۆڕانە، بۆیە دەنگ و متمانەی منیش هەر بۆ تیشکی روناکی مۆمەکەی گۆڕانە.