سەردەمانێک، پێشمەرگەیەک ئەهاتەوە و تەسلیم بە حکومەتی عیراق ئەبوەوە ، سەرەتا، ئەچوە دائیرەی ئەمن و خۆی ئەناساند، کە ئەبو پیاوێکی رژێم بیبردایە.

پێشوازییەکی بە ئەفسەرێک لێ ئەکرا و تەواوی پرسیارەکانی لێ ئاڕاستە ئەکران، بەکورتی؛ دایان ئەدۆشی لە زانیاریی تەواو، لەسەر هەمو شتێک دەربارەی شۆڕش و پێشمەرگە، لەکۆتایی دا فۆرمێکی پێ ئیمزا ئەکرا، کە هاوکار و موعتەمەدیان بێت، لەهەر هەواڵ و زانیارییەک لەبارەی جموجۆڵ و ئەندامانی رێکخستن و پێشمەرگە لەناو شار، پسوڵەی رێگەپێدانی  پێ ئەدرا و ئەخرایە ژێر چاودێری.

ئەو پرۆسەیە ناونرابو "گەڕانەوە بۆ صەفی وطنی" .

دیارە شۆڕش و پێشمەرگە لەئەدەبییاتیاندا بەصەفی خیانەت و تێکدەران و عوصات ئەدرانە قەڵەم، کەم نەبون ئەوانەی کە ئەگەڕانەوە و ئەبون جاشی سوک و جاشی قورس و مەفرەزە خاصە.

دوای بڕیارەکەی دادگای فیدراڵی، زاراوەی "توطين"، یان هەندێک وتەنی "تەوتین"، بوە وێردی سەر زمانی زۆرێک و لەناویشیاندا ژمارەیەک پەرلەمانتار.

من تەواو دژی سیاسەتی برسیکردن و سەرپێشۆڕکردن و ملکەچکردنی تاکی کوردم، بەهەمان شێوە و توندتریش دژی دزی و چەتەگەریی و تاڵانکردنی سەرخان و ژێرخانی ئەم کورد و کوردستانەم، کە لەسەر دەستی سیستمی حیزبی و حکومی عائیلی چوەتە ئاستێک، برسێتی و هەژاری و بێکاری و نەخۆشی و ناعەدالەتی رۆچوە تا سەر ئێسقان، نەهامەتییەکان دەرگای بەهەمو تاک و خێزانێک گرتوە و لە توانا و بەرگەگرتنی خەڵکدا نەماوە، من لەگەڵ هەمو خەبات و بەرهەڵستییەکدام کە بەشێوەیەکی داڕێژراو لەڕوی زانستی و سیاسی و رێکخراوەیی و فکری و شەفاف، بەستراتیژ و تاکتیکی مەدەنی و یاسایی، ئاڕاستە بکرێت، دور لەبەکارهێنان و قۆستنەوە بۆ ئەجێندای ئەملاو ئەولا و دەوروبەر.

بەڵام، ئەوەی کە دەبینرێت، زۆر بێ بەرنامە و کورتکراوە لەهەندێک دروشم و داوای بێ پێزدا بەڕێوەدەچێت.. لە تەوطين تەوطین زیاتر نییە.!

کام تەوطین؟

تەوطینێک کە بەرەو خواستە گوماناوییەکانی بەغدایەکی تائیفی بێت، کە داهات و بەڕێوەبردنەکەی حکومەتێکی قوڵی سێبەری تەواو ئێرانی ئەنجامی ئەدات؟

سیستمی حیزبگەلێکی ئایینی کە لەئاست قۆناغەکە دا نییە و نە بڕوای بە دیموکراسی هەیە و نە بە سیستمی فیدراڵی و نە بە مافەکانی گەلی کورد لە عێراق؟

ئایا؛

خەڵکی کوردستان لە صەفی وەطەنیدان، یان حکومەتی بەغداد و دامەزراوە تائیفیە ئێرانییەکانی؟

ئەوەی ئەگوزەرێت؛

خەباتێکی چینایەتی و پیشەیی ناڕێکخراوە بۆ توێژی مامۆستایان لەناو چینی موچەخۆرانی دەوڵەتییدا.

هەربۆیە پێشوازیی جەماوەریی لەو جوڵەیە لە بازنەیەکی تەسکدایە و هەردو حیزبی دەسەڵاتیش بێباکن لێیان!

ئەو تەوطینەش پێویستە ئەوسەری لێک بدرێتەوە، چونکە ئومێد هەڵچنین و بەخشینی هیوا بەخەڵکی کوردستان بەرپرسیارییەتییەکی قورسە.

موچەخۆران، کارمەندی دەوڵەتیین لە هەرێمێکی فیدراڵیدا، نەوەک لەدەرەوەی دەوڵەت و حکومەتێکی بیانی، سەرباری ناڕازیبونمان لە سەروبەری ئەم 9 کابینەیەش.

مامۆستایانی بەڕێز..

ئێوە تەنها پێویستیتان "موچە" نییە، هەرچەند ئەولەویاتە و مافێکی سروشتی و یاساییتانە بەرامبەر کارێک کە بۆ دەوڵەتی ئەکەن.

لێتان ئەپرسم؛

ئێوە پێویستیتان بەبودجە و خزمەتگوزاریی و دادگای دادپەروەر و سەربەخۆ نییە؟

پێویستیتان بە شەقام و دایەنگە و زانکۆی حکومی و نەخۆشخانەی نیشتمانیی و خۆڕایی و خانووی نیشتەجێبون و گەرەنتی ژیانی مناڵ و نەوەکانتان نییە؟

ئێوە پێویستیتان بە کەمکردنەوەی باج و کرێی خزمەتگوزارییەکان و قەزری بانکی حکومیی و پاڵپشتی دارایی دەوڵەت نییە بۆ خۆشکردنی ژیانی خۆتان و خانەوادەکانتان بە ئارامیی؟

ئێوە پێویستیتان بەدڵنیایی کارکردن نییە بۆ نەوەکانتان و خوێندکارەکانتان؟

ئێوە پێویستییەکانی ژیانتان زۆر لەو تەوطینە گەورەترن.

ئێمە چاومان لەوە بو کە پێشڕەوایەتی خەباتی مەدەنیانە و دیموکراسییانەی میللەتێک بکەن بەئاڕاستەی گۆڕانکاریی، بەرەو حکومەتێکی نیشتمانی دور لە عەسکەرتاریەت و دەسەڵاتی عائیلی و میلیشیایی، حکومەتێک، حکومەتی خەڵک بێت، کە ئێستا پارێزەری بەرژەوەندی کۆمپانیا حیزبی و جیهانییە زەبەلاحەکانن، سامانی وڵات بەرەو دەرەوەی سنورەکان ئەبەن و نەهامەتییەکان خەست ئەکەنەوە لەسەر هاونیشتمانییان.

ئەوەی ئێستە ئەیبینین، بچوککردنەوەی ئەم هەمو ناعەدالەتییانەی ژیانی کۆمەڵگەیە لە دروشمی تەوطینێک، کەلای شۆڤێنییەکان لە عێراق "کلمة حق يراد بها الباطل" ، نامەوێت بچمە قوڵایی مەترسییەکانی پشت ئەو پرۆسەیە، کە لای من وەک ئابوریناس و چالاکێکی سیاسەت زۆر رونە، نەوەک بخرێینە خانەی پیاوانی سەر بەدەسەڵات.

بەبڕوای ئێمە، پرسی "توطين" دڵۆپێکە لەدەریای ئامانجە نیشتمانییەکانی تاک و کۆمەڵگای کوردستانیی و عێراقی، بەڵام بەشێوازێکی یاسایی و دەستوریی، کەماف و کەرامەتی تاک و کۆمەڵگەی کوردستانیی و بنەماکانی هەرێمێکی فدراڵیی دەستوریی، تێیدا پارێزراو بێت.