بەڕێوەبەرایەتی پۆلیسی راپەڕین بڵاویکردوەتەوە، تۆمەتبارێکیان دەستگیرکردوە و کە لە پرسەیەکدا زیاتر حەوت هەزار دۆلاری لە کەسێک بردوە، دەشڵێت: تۆمەتبارەکە لە دەرەوەی وڵات دەژی و چەندین تاوانی دیکەی دزیکردنی ئەنجامداوە.

هەواڵ:KNNC

لە راگەیەنراوەکەی پۆلیسدا هاتوە، دوای ئەوەی هاوڵاتییەکی دانیشتوی دەرەوەی سنوری ئیدارەی راپەڕین لە بەرواری (15/4/2025)، سەردانی رانیەی کردبو بەمەبەستی بەشداریکردن لە پرسەیەکدا، لەلایەن کەسێکەوە بڕی (سێ هەزار دۆلار)ـی ئەمەریکی و (حەوت ملیۆن) دیناری عێراقی لەناو ئۆتۆمبێلەکەی لێدزراوە.

دەشڵێت: بەدواداچونەکانیان دەستپێکردوە و توانراوە لەماوەی کەمتر لە 24 کاتژمێردا ناسنامەی تۆمەتبار ئاشکرابکرێت کە لەدایکبوی ساڵی (1985)ـەو خەڵکی رانییەیە، بەڵام لەدەرەوەی وڵات دەژی.

پۆلیسی راپەڕین دەشڵێت: تۆمەتبارەکە دانی بەتاوانەکەیدا ناوە و لەکاتی دەستگیرکردنیشدا دەستگیراوەبەسەر بڕێک پارەی دزراودا، هاوکات، پێشینەی تاوانی هەیە و دوو جاری دیکە بە تاوانی دزیکردن سزادراوە و فەرمانی دەستگیرکردنی هەبوە.