وەبەرهێنان لە دروستکردنی یەکەکانی نیشتەجێبون لە هەرێمی کوردستان بەشێوەیەکی گشتی:

1- داهێنانی مۆدێلێکی وەبەرهێنانە کە لە بەشێکی زۆریدا پشت بە داگیرکردن و وێرانکردنی خاک و سروشت دەبەستێت و بەهیچ شێوەیەک ڕەنگدانەوەی زۆربون و هەڵکشانی ژمارەی دانیشتوانی هەرێم نییە.

2- وەبەرهێنان لە دروستکردنی یەکەکانی نیشتەجێبوندا کەرتێکی مۆنۆپۆلکراوە لەلایەن ئەوانەی لەم ساڵانەی دواییدا لە سایەی ئابوریی حیزبییەوە بونە ملیۆنێر و ملیاردێری دۆلار.

3- برەودان بە بواری دروستکردنی زۆرتری یەکەکانی نیشتەجێبون، وەبەرهێنانە بۆ ده‌وڵه‌مه‌ندبونی‌ خێرا. دەوڵەمەندبونی خێرا درێژكراوه‌ی‌ كولتوری‌ تاڵانوبڕۆ و له‌ هه‌مان کاتدا ڕه‌نگدانه‌وه‌یه‌كی‌ ڕاسته‌وخۆی‌ ئابوریی‌ حیزبییه‌، ئه‌و ته‌رزه‌ ئابورییه‌ی‌ كه‌ جگه‌ له‌ كوردستان و عێراق له‌ هیچ شوێنێكی‌ دنیادا بونی نییە. ده‌وڵه‌مه‌ندبونی‌ خێرا جگه‌ له‌وه‌ی‌ له‌ڕێی‌ کەسە دەستڕۆێشتوەکانی‌ حیزب و حکومەتە‌وه‌ ئاڕاسته‌كراوه‌، شێوازێكی‌ تایبه‌ته‌ له‌ ده‌وڵه‌مه‌ندبون له‌ سایه‌ی‌ نه‌بونی‌ سیستمێكی‌ ڕۆشنی‌ باج و واوه‌تریش نه‌بونی‌ ده‌سه‌ڵاتی‌ قانوندا. بۆیە ئەم شێوازە لە وەبەرهێنان لە بەشێکیدا دەچێتە خانەی شه‌رعه‌نه‌كردنی‌ تاڵانییەوە.

4- وەبەرهێنان لەم کەرتەدا کایەیەکی لەبارە بۆ سپیکردنەوەی پارەی پیس، ئەو پارەیەی لە ئەنجامی تاڵانوبڕۆی کوردستان و عێراقەوە بەردەوام دەڕژێتە گیرفانی دەستەبژێری سیاسیی گەندەڵ و نزیکەکانیانەوە.

5- لەو سۆنگەیەی کە بەشێکی زۆری ئەم ڤێلا و یەکانە لە مۆدێلی های کڵاسن، زۆربەیان ڤی ئای پییەکانی کورد و عەرەبی هاوردە لێی سودمەندن نەک چینە نەدار و مامناوەندەکانی کوردستان.

6- وەبەرهێنان لە دروستکردنی یەکەکانی نیشتەجێبوندا مۆدێلێکی نوێ و مەترسیداری تەعریبکردنی کوردستانە بەناوی وەبەرهێنانەوە. (بەگوێرەی هەندێک لە ستاتسە فەرمییەکان [هی ساڵی ٢٠٢٠] زیاتر لە یەک ملیۆن عەرەب نیشتەجێی هەرێمی کوردستانن (هەولێر 600 هەزار 29%، دهۆک 275 هەزار 16%، سلێمانی 160 هەزار 7%) لە ئێستادا ئەو ژمارەیە ملیۆن و نیوێکی تێپەڕاندوە.

7- ئەم مۆدێلەی وەبەرهێنان لە کاتێکدا بەردەوام کار لەسەر دروستکردنی بە (بەهەشتکردن)ی ڕوبەری ناو سنورەکانی خۆی دەکات، هاوتەریب دنەی (بە ئۆردوگاکردن)ی بەشەکەی تری شار دەدات.

8- ئەم مۆدێلەی وەبەرهێنان لە کاتێکدا کار لەسەر بە (گوندکردن)ی ناوەندی شار دەکات، هاوتەریب کار لەسەر بە (مەزرەعەکردن)ی گوندەکان دەکات.

9- سیتی و گوند و کۆمەڵگاکانی ئەم یەکانەی نیشتەجێبون، تا ڕادەیەکی زۆر برەودانە بە دروستکردنی مڕومۆڵگە (مستوطنات)، ئەوەی کۆڵۆنیالیستە ئەوروپییەکان لە سەدەکانی پێشودا وەکو ستایڵێکی ژیانی تایبەت بە خۆیان و بۆ خۆجیاکردنەوە لە هاوڵاتیانی ڕەسەنی ئەو وڵاتانە بۆ خێزان و سوپا و بازرگانانی خۆیان لە وڵاتە داگیرکراوەکاندا دروستیان دەکردن.

10- هۆکاری هەڵکشان بۆ داگیرکردنی ئەو ڕوبەرانەی کە هێشتا دەستی داگیرکارییان پێ نەگەیشتوە (چیا و دامێنی گۆیژە بەنمونە)، برەودانە بە ژیان لەسەر هەمان ڕیتمی مڕومۆڵگە. ئەو مڕومۆڵگە لەیەک دابڕاوانەی کە لەڕێی فراوانبونی جیاوازییە چینایەتییەکانەوە، وردە وردە تەونی کۆمەڵایەتیی و ئاشتیی کۆمەڵایەتیی کوردەواری بەرەو ئاقارێکی مەترسیدار دەبەن.

11- ئەوە قسە هەڵناگرێت ئەوانەی لە پشتی ئەم کارەساتەوە وەستاون، ئەو سیاسییە گەندەڵانەن کە پۆستە حیزبی و حکومەتییەکانی خۆیان خستۆتە خزمەتی ئەم جۆرە پڕۆژانە و بونەتە بازرگان.
12- بێگومان ئەمەش لە بەشێکی گەورەیدا پێوەندی بەو گۆڕانە دراماتیکییەوە هەیە کە لەم ساڵانەی دواییدا و پاش دابارینی پارەی نەوت و گرتنە دەستی دەسەڵات لەلایەن نەوەی دوەم و سێیەمی سیاسییەکانەوە، بەسەر حیزبی چەکداری کوردیدا هات و لە جیاتی حیزب، ئێستا ئێمە ڕوبەڕو لەگەڵ دەرەبەگایەتییەکی چەکداردا دەرگیرین.

13- بەدەنگەوەهاتنی هاوڵاتیان لەسەر سروشت و موڵکی سلێمانی، خودهۆشیاریی و خودئاگاییەکی یەکجار کەشخە و ڕاقییە، ئەم لەسەرکردنەوەیەی هاوڵاتیان لە سروشت و موڵکی شارەکەیان کوردبون و کوردستانییەتێکی سەربەخۆی نوێیە کە زیندوێتی کۆمەڵگەی مەدەنیی (لانی کەم) سلێمانیمان پیشان دەدات.

14- ڕاستییەکەی دەسەڵاتی سیاسیی کوردی عەیامێکە شەقاوی گەورە گەورەی ناوە، بۆ ئەوە نا سیستم دروست بکات، بۆ ئەوەی هەرچی زوترە ببێتە یەکێک لە کۆمارەکانی مۆز!