سەبارەت بەو پرسیار و رەخنە حەقەی، کە دەوترێت بۆ گۆڕان درەنگ لە حکومەت کشایەوە؟ ئێمە لە ماڵی خۆمانەوە، چیرۆکێکی خەمگین یادی هەموان دەهێنینەوە و پاشان گرنگی کشانەوە دەخەینەڕو:

 

یەکەم: ئەو قسەیە درۆ بو، کە لە کاتی بردنی گۆڕان بۆ ناو حکومەت دەوترا، ئەگەر لە ماوەی ٦ مانگدا چاکسازی نەکرێ ئەوا دەکشێینەوە، ئەمە بۆ چەواشەکردنی گۆڕانخوازان بو، هەر لە ئەسڵدا بەو نیازەوە گۆڕان پاڵنرایە ناو حکومەت، نەکشێتەوە، بەڵکو تێیدا بتوێتەوە. واتە بۆ چاکسازی نەبو، بەڵکو وەک ئەوە وابو پاڵەوانێکی یاخی بە قۆڵبەستراوی رادەستی جەللادەکان بکرێت.

 

دوو: بەڵی خەڵکینە ئێوە راست ئەکەن، گۆڕان لە ترسی هەڵبژاردن و دەنگدەرەکانی لە حکومەت هێنرایە دەرەوە. ئەزانن چۆن؟

 

خۆتان بیرتانە لە 2018 کەسانێک رێگربون لە بەردەم خواستی تەوریس و چونە حکومەت و بەلاڕێدابردنی گۆڕان؛ لە بەر ئەوە دەرکران؛ سەرئەنجام سێ ساڵ پێش ئێستا، رێک لە رۆژێکی وەک ئەمڕۆدا، لە 10ی 10ی 2021 لە هەڵبژاردنی پەرلەمانی عێراقدا، گۆڕانخوازان و دەنگدەرانی هوشیار، سفر کورسیان بەخشی بە دەستڕۆیشتوانی گۆڕان.

 

بێگومان، لە ترسی ئەوەی نەبادا جارێکی تر لەم هەڵبژاردنەشدا سزا بدرێنەوە، ئەمە وای کرد هەندێک لە بڕیاربەدەستانی حیزبەکە، بڕۆن. هەر ئەمەش دەرفەتی رەخساند تا (کەسانێکی تر)، گۆڕان لە ناو زەلکاوی فەسادی بەناو حکومەت و قەفەسی زەلیلی راکێشنە دەرێ.

 

سێ: بە ئەگەری گەورە دوای هەڵبژاردن، لەوانەیە بە شەش مانگیش، حکومەت نوێ دروست نەبێت، جا هەندێک نیازیان وابوە، ئەو ماوەیەش بمێننەوە و ئیدارەی بەرژەوەندیەکانی خۆیان بدەن، بەڵام دەنگدەران نەیانهێشت ئەو نیەتەشیان بێتە دی.

 

دەی، ئەمەیە گرنگی شەقی پیرۆزی گەل و خاڵی وەرچەرخان، ئەمەیە کرۆک و رۆحی هەڵبژاردن و دیموکراسی، کە هاوڵاتییان و دەنگدەران بتوانن ئیرادی خۆیان بسەپێنن و لە حیزب و حکومەتدا گۆڕانکاری و دەستاودەستی دەسەڵات دروست بکەن، ئەرکی حیزبیش هەر ئەوەیە لە جەماوەر و دەنگدەرانی بترسێت و بچێتە ژێر باری داواکانیان و گۆڕانکاری لە خۆیدا بکات.

 

سەرنج بدەن و بەراوردێک بکەن، دواجار گۆڕان کشایەوە و چوە ژێر باری ئەوەی لە داهاتودا ئۆپۆزسیۆن دەبێت، ئەی لە بەرامبەر ئەمەدا چی دەبینن؟

 

ئەوەی دەیبینین سەرۆک و کوڕانی دوو بنەماڵەی دەسەڵاتدار، کە داهێنەر و پاڵەوانی خیانەت و سەرچاوەی گەندەڵی و هەمو بەدبەختیەکی ئەم گەلەن، (لە حكومەتەکەشدا هەر ماونەتەوە)، کەچی بە جوڵە و ئاماژەی سوک و پوچ و درۆی تازە، وەک ئەوەی خەڵک بە مەڕ بزانن، زۆر بێ شەرمانە دەچنەوە بەردەمیان و داوای دەنگیان لێدەکەنەوە!

 

گۆڕانخوازان ئەمەی گوتم راستی بو، بیرخستنەوە و پیشاندانی چیرۆکی پاڵەوانێتی خۆتان بو، بۆیە شانازی بکەن، ئێوە لە دەنگدەری هیچ حیزبێکی تر نەچون، جیاوازبون. ئێمەش دڵخۆشین، کە هەرگیز دەستەمۆ نەبوین و نابین، هەردەم بەشێک بوین لە بیر و هەڵویست و ویژدانی ئێوە.

 

راستە پرۆسەی کشانەوە زۆر دوا کەوت، بەڵام وا دروستە لەو گۆشە نیگایەوە ببینرێت، بۆ یەکەم جار لە مێژوی حیزبی کوردیدا، دەنگدەر و جەماوەر تەنها لە بزوتنەوەی گۆڕاندا، توانیان لە سەپاندنی بڕیاری خۆیاندا سەرکەوتو بن، رێگای دروست ئەوەیە هەر لە گۆڕاندا بەردەوامی و پەرەی پێ بدەن.

 

لە دونیای بیرمەند و کۆمەڵگە هوشیارەکاندا مرۆڤ هەیە، سۆبێکتی پاڵەوانیش هەیە؛ مرۆڤ هەمومانین، من و تۆ، دەنگدەرێکی دەسەڵات، ماستاوچی و خۆپەرست و ترسنۆکێک، هەمو مرۆڤین.

 

ئەی سۆبێکت چییە؟ سۆبێکت یان پاڵەوان، ئەو مرۆڤانەن، کە چەواشە ناکرێن، چاک و خراپی خۆیان و خەڵک دەزانن، بیر دەکەنەوە، کۆیلایەتی بۆ حیزب و سەرۆک و بنەماڵەکان قبوڵ ناکەن، خەمی گەل و نیشتیمانیان هەیە، هەرکات ویستیان حیزب گەورە دەکەن، هەرکات حیزب هەڵەی کرد گچکەی دەکەنەوە.

 

پاڵەوان و سۆبێکتەکانی گۆڕان دەسەڵاتخواز و بنەماڵەخوازەکانی نەبون، بەڵکو گۆڕانخوازان و دەنگدەرەکانی بون.

 

دەی، ئەمەیە کۆد و سیحری گۆڕانکاری و پێشکەوتنی گەلانی تر، ئەگەر زۆرینەی گەلی ئێمەش دەیانەوێ گۆڕانکاری لە دەسەڵاتیشدا روبدات، دەبێ چاو لە دەنگدەرانی گۆڕان بکەن.

 

لە کۆتایدا جێی خۆیەتی بڵێم: سەرباری گەورەیی و هەنگاوە جیاواز و مێژویەکانی گۆڕانی 2009 بۆ 2018 وەلێ نەخەمڵیو بو، لە هەناوی خۆیدا ماکی شکستی هەڵگرتبو، لە سەردەمی کاک نەوشیروانەوە پەنجەمان خستە سەر برینەکان، بەڵام ئەشێ هەڵە و شکستەکانی رابردو، بۆ لێرە بە دوا ببنە هەوێنی بەخۆداچونەوەی ریشەیی و بوژانەوە و لەدایکبونەوەیەکی نوێ.

 

هەرگیز فشە وتاف و حیزبی کەسی و بنەماڵەیی ناتوانێ هەوێنی حکومڕانی باش بێت، بێگومان لە سایەی پارتی و یەکێتیدا بەڵێنی چاکسازی و چاککردنی حکومەت، بەردێکی گەورەیە تەنها درۆزنەکان بانگەشەی هەڵگرتنی دەکەن.

 

بۆیە باشترین کار و کەمپینێک گۆڕانەکان لەم هەڵبژاردنەدا بیکەن ئەوەیە: دڵنیایی بە دەیان هەزار گۆڕانخوازی توڕە و نیگەران بدەن، کە گۆڕان لە روی فکر و پێکهاتەوە خۆی چاک و نوێ دەکاتەوە و، بڕیار بدات روخسار و بەرپرسە باڵاکانی حیزب و حکومەت، کە بەرپرسن لە شکستەکان، بە تەواوی لە وەرگرتنەوەی بەرپرسیارێتی ببەخشرێن.

 

بێگومان بەرەنگاربونەوەی هەوڵەکانی تەوریس و کشانەوە لە حکومەت و هەڵبژاردنی رێگای ئۆپۆزسیۆن بون، بڕیاری گەورەو بێ پێشینەن، بۆیە ئێمەومانان بۆ هەنگاوی باش پشتیوانتان دەبین، تا بە متمانەوە بەرەو پێشەوە بڕۆن، هەروەک رەقیبێکی چاوتیژ و چالاکین، لە سەر هەنگاوەکانی داهاتوتان.

122 جار خوێندراوەتەوە