لە نێو ئەم فەوزا پۆپۆلیستی و ئانارشیستیەدا، لە نێو ئەم قیڕە قیڕ و زمان پیسیەدا، لە نێو ئەم بەڵێنی بێ کردار و دوبارانەدا، لە نێو ئەم  بەکارهێنانی ئایین و بەها پیرۆزانە بۆ دژایەتیکردنی ئاشتی کۆمەڵایەتییەدا، تاکە هیوا گەڕانەوەیە بۆ پەیام و بەرنامە ئیسڵاحییەکانی سەرەتاکانی بزوتنەوەی گۆڕان.

بەڵام کێن ئەوانەی دەتوانن ئەو پەیامانە بکەن بە کردار!؟

بەدڵنیاییەوە لە رابردودا پەرلەمانتار و کاربەدەستی دڵسۆزی گۆڕان هەبون بێ خۆدەرخستن و دروشمی پۆپۆلیستیانە، کاریان کرد بۆ پراکتیزەکردنی ئەو بەرنامەیە و ئەوەی ئێستا هەیە و خەڵک هۆشیارە بەرهەمی ماندوبونی ئەوانە.

بەڵام هەم گۆڕان و هەم بەرنامەکەی بون بە قوربانی کۆمەڵێک فورسەت تەڵەب کە  بە دروشمی قەبەکانیان گۆڕانیان بەلاڕێدا برد یان خۆیان بۆ پلە و پۆست بەم و بەو فرۆشت و ئێستا هەر رۆژە و لە شوێنێکن و جێ بەخۆیان ناگرن.

لە نێو گۆڕاندا کۆمەڵێک هەبون کە ئیستقامەیان هەبو، جێگەی شانازی گۆڕانن، کە بەرپرسی گۆڕان بون یاخود پەرلەمانتار، کە وەزیر  یان قایمقام یان مودیر عام بون وەزارەت و فەرمانگەکانیان کرد بە دەرفەت بۆ خزمەتی خەڵک و جێبەجێکردنی بەرنامەکانی گۆڕان، ئێستا بەشێک لەوانە کاندیدی بزوتنەوەی گۆڕانن، لە تاقیکردنەوەی بازاڕی کڕین و فرۆشتن دەرچون، وەک چۆن لە تاقیکردنەوەی جێبەجێکردنی ئەرکەکانیان دەرچون زۆر سەرکەوتو بون، بۆیە بۆ رزگاربون لە قیڕە و هات و هاوار بۆ  رێگریکردن لە چونی خەڵکانی خاوەن بەڵێنی بێ کردار  بۆ دەزگای یاسادانان و لە پێناوی جێبەجێکردنی بەرنامە سەرەتاییەکانی گۆڕان، حکومەتێکی خزمەتگوزار و پەرلەمانێکی بەرپرس و و زاڵکردنی دەسەڵاتی یاسا و دادپەروەری کۆمەڵایەتی و  نەمانی مەحسوبیەت و مەنسوبیەت  بو بە ئەرکی سەرشانی خۆمانی بزانین و دەنگیان پێ بدەین.