بۆ ئەوەی لە فۆڕمی دەسەڵاتی سیاسی لە هەرێم تێبگەین، پێویستیمان بە حیکمەتێکی زۆر نابێت، پێویستیمان بە گەڕان و پشکنینی گەورەی نێو لاپەڕەکانی کتێب و چیرۆکەکانی مێژو نابێت، ئەوەندە بەسە نەوەی پێش ڕاپەڕین، ئاوڕێکی جددی لە مێژوی دوای ڕاپەڕین، نەوەی دوای ڕاپەڕینیش سەرێک بکاتەوە بە نێو ماڵی ڕوداو و حیکایەتەکانی پارتی و یەکێتی لە دوای پرۆسەی ئازادی عیراقەوە. لەم دۆخە ناسروشتی و سەمەرەیەی هەرێم، هەمو چیرۆکەکان دەمانبەنەوە نێو یەک بازنە، ئەویش ئەوەیە، نە پارتی بەبێ یەکێتی، نە یەکێتی بەبێ پارتی، دەتوانن دەسەڵاتی سیاسی لە هەرێمی کوردستان پێکبهێنن و ئیدارەی بدەن، ئەمەش بە پلەی یەکەم، پەیوەندی بەم هاوکێشە ناوچەیی و عیراقییەوە هەیە، دەیانساڵە لە پشت ئاڕاستەکردنی سیاسەت و بڕیاری شەڕ و ئاشتییەوە وەستاوە لە هەرێمی کوردستاندا. لێرەوە هەر بەرزی و نزمییەک، هەر هەڵکشان و داکشانێک، لە گوتاری پارتی و یەکێتی، جگە لە چەواشەکردن و بەلاڕێدابردنی ڕایگشتی و چنینەوەی دەنگی دەنگدەران، هیچی دیکە نییە.

پارتی و یەکێتی لە زیاد لە سی ساڵی ڕابردودا، بەرپرسی سەرەتا و کۆتایی کۆی قەیران و گرفتە سیاسی، ئابوری و کۆمەڵایەتییە موزمینەکانی باشوری کوردستانن، لە ئێستایش و دوای ئەنجامدانی دەیان هەڵبژاردنی دیکەیش، بەم عەقڵیەت و فۆڕمی کاری حیزبییە، بەم گوتارە نەخۆش و کوشندەوە، هێزی ساڕێژکردنی برینی جەستەی منداڵێکی بەجێماوی ئەنفال و کیمیابارانی کوردستانیان نابێت، چجای گرفت و قەیرانە قوڵەکانی کۆمەڵگەی کوردستانی و بچوککردنەوەی قەبارەی ئەم مەترسیانەی لە ناوەوە و دەرەوەی هەرێمدا، پرسی نەتەوەیی و نیشتمانی ئێمەی وەک کورد، خستوەتە بەردەم نوکی چەقۆی تیژی دوژمنان و نەیارانی پرسی سیاسی و ڕەوایەتی دۆزی نەتەوەیی کوردەوە.

پارتی و یەکێتی، بە چاوپۆشین لە گەڕانەوە بۆ مێژویەکی دورتر، لە سێ دەیەی ڕابردودا، بەرپرسیارێتی سیاسی و ئەخلاقی هەڵوەشاندنی کۆمەڵگەی کوردییان دەکەوێتە ئەستۆ، لە پرسی سیاسی و کۆمەڵایەتیشدا، هیچ شتێک هێندەی پرسی هەڵوەشان و پارچە پارچەکردنی کۆمەڵگە مەترسیهێنەر و ترسناک نییە. ترسناکە، چونکە لە وەها دۆخێکدا بابەتێک لە ژێر ناونیشانی پرسی نەتەوە و دۆزی خاک و نیشتمان لە هۆشیاری گشتیدا ئەگەر بەرەو لەناوچونیش نەچێت، بەرەو کاڵبونەوە و بچوکبونەوە هەنگاو دەنێت، بچوکبونەوەیەک، ڕەنگە بڕێک پارەی کەم، یان پۆستێکی ئیداری بێبەها، سەنگی لە قورسایی و کەرامەتی مرۆڤ و بەهای مرۆڤبون قورستر و گەورەتر بێت.


پارتی و یەکێتی، لە هەر دۆخێکدا بوبن، شەڕ، یان ئاشتی، حکومەتی یەکگرتو، یان دو حکومەتی، خزمەتییان بە یەک ستراتیژ کردوە، ئەویش بریتیبوە لە فوکردن بە جەستەی حیزب، بچوکردنەوەی حیزبیش لەبەردەمی بنەماڵە، بنەماڵەش لەبەردەمی خێزانی سیاسی و سەرۆکی پیرۆز. ئەوان لە هەمو دۆخێکدا، بە هەمو هێزییانەوە، خەریکی تێکشکاندنی کۆمەڵگە و ئیرادەی مرۆڤی کوردی بون، هەوڵیانداوە چەمکە ستراتیژی و گەورەکانی وەک نەتەوە و نیشتمان، ببەنەوە نێو ماڵی حیزب و بنەماڵە و لە مەنگەنەی خێزانی سیاسی و سەرۆکی مەزن و قارەمانی بدەن. بە مانا هەوڵیانداوە، چەمکە گشتییەکان، پیرۆزییەکان، بخەنە خزمەتی چەمک و مانای بچوکتر، مانایەک نە هی سەردەم و قۆناغی ژیانی سیاسی دیموکراسییە، نە هی قۆناغی بەهێزکردنی پرەنسیپەکانی نەتەوە و دامەزراندنی ژێرخانی دەوڵەت و دەوڵەتدارییە. بۆیە وەک بەختیار عەلی دەلێت: ئەمانە دو حیزب نین، دو تاعونن، دۆستایەتی یەک بکەن هەر بەدبەختییە، دوژمنایەتی یەکیش بکەن بە ماڵوێرانی کۆتایی دێت.

لێرەوە گرنگە بۆ هەر کەسێک، کە دەنگی هەیە و بڕیارە بەشداری پرۆسەی دەنگدان بکات، ئەگەر نەتوانێت بەشێوەی گەورەتر لە کەمکردنەوەی مەترسییەکانی پارتی و یەکێتی بەسەر کۆی جومگەکانی ژیانی سیاسی و کۆمەڵایەتی کۆمەڵگە بەشداری بکات، ئەوە لانیکەم، وەک هاونیشتمانییەکی ئاسایی، کە بەگوێرەی پێگەی خۆی بەرپرسیارێتی ئەخلاقی و کۆمەڵایەتی لە ئەستۆدایە، دەتوانێت بە دەنگ پێنەدان بەم دو هێزە سیاسییە تاعونییە، نەک لە کەمکردنەوە و بچوککردنەوەی مەترسییەکانیان بۆ سەر ژیانی گشتی کۆمەڵگە و ئازادی و ئینسان، بەڵکو دەتوانیت دەنگێکی هۆشیاریش بیت لە ڕێگرتن لەبەردەم درێژکردنەوەی تەمەنی ستەمکاری و نادادی کۆمەڵایەتی.