پەیامەکەی ئەمڕۆی سەدر، هێندەی سیاسی بوو، هێندە
دینی نەبوو. راستە لە ڕواڵەتدا بۆنەکە دینی بوو، نوێژی هەینی بە پۆشینی کفنەوە، کە
مانا و هێمای ئاینین، بەڵام ناوەڕۆکی پەیامەکە شتێکی جیاوازتر بوو. ئەمڕۆ دین ڕووپۆشێک
بوو بۆ گووتنی پەیامێکی جیاوازتر لە دین، ئەمڕۆ سیمبولەکان لە ناو دینەوە دێن، بەڵام پەیام و گوتارەکان سیاسیین، پەیامی
سیاسی و نمایشی پێگەی سیاسی و جەماوەری، پەیامی هەڕەشەکردن بە زمانێکی نەرم و سەردەمیانە،
پەیامێک هەڵگری نامەی هەمەجۆری چەندبارە بوو بۆ جارێکی دی لەرزاندنی قاچەکانی ئەو
کورسییەی کە ڕەنگە بەشێک لە نەیارە پلە یەکەکانی ئێستای سەدر، هیوا و خەونی ڕەنگاڵەییان لەسەر هەڵچنیبێت.
سەدر لە پەیامەکەیدا هیچی نوێی نەگووت، تەنیا ئەوەی
بە بیر گروپی چوارچێوەی هەماهەنگی هێنایەوە: «بیر لە مالکی و هاوکارەکانی بۆ پۆستی
سەرۆک وەزیران نەکەنەوە، ئەگینا ئەم حەشاماتە چۆن ئامادەن بە تویتێکی من ڕێگە بەرەو جەهەننەم ببڕن، ئامادەیشن ئێستای ئێوە بگۆڕن بە
دۆزەخ».
سەدر گووتی: بێوەرگرتنی ڕەزامەندی پێشوەختەی
من، هیچ سەرۆک وەزیرانێک بە ئارامی توانای دانیشتن لەسەر کورسی دەسەڵات لە بەغدای
نابێت و هیچ حکومەتێکی تەمەن درێژیش بوونی نابێت.
پەیامی سەدر ڕوون بوو، ئێمە لە پەرلەمان کشاینەوە،
بەڵام هێشتا هیچ فراکسیۆن و هێز و فیگەرێکی سیاسی و دینی، لە دەرەوەی متمانەی دەرەوەی
پەرلەمانی ڕەوتی سەدر و خودی موقتەدادا، توانای هەناسەدانی بە ئاسوودەیی نابێت!
وتى،" ئەوە
ئێمەین لە دەرەوەی پەرلەمان و حکومەتدا، شوناس و مانا بە بوونی سیاسی ئەو دامەزراوانە
دەدەین و هێزی مانەوەیان پێدەبەخشین. کورت و پوخت، ئەوەی تا ئێستایش لە عێراقدا، بڕیار
لە شەخسی سەرۆک وەزیران و فۆرمی ئیدارەدانی وڵات و فیگەرە سیاسی و ئیدارییەکانی دەدات،
تا ڕادەیەکی گەورە، (حەنانە)یە نەک (بەغدا).
282 جار خوێندراوەتەوە