بە نزیکەی سەدەیەک بەر لە ئێستا، عێراقێک بۆ بەرژەوەندی بەریتانیا و فەرەنسا، نەک خەڵکەکەی دروستکرا! ئەو عێراقەی ئەوکات و ئێستاش زەمینی بەرژەوەندی زلهێزەکان و قەبری دانیشتوانەکەی بوە، هەربۆیە خۆپیشاندانەکان و تەقینەوەی توڕەیی خەڵکی شیعە چاوەڕوانکراو بوە و دۆخی ژیانی سونەکان و کورد-یش مایەی خۆشبەختیەکی زیاتر نیە.

دوای تێپەڕبونی ساڵێك بەسەر رزگاركردنی موسڵ لەدەستی رێكخراوی داعش و دواتر ئەنجامدانی هەڵبژاردنە پەرلەمانیەكەی (12 ئایاری 2018) كە بەهۆی ساختەكاری و یاریكردن بە دەنگەكان قەیرانێكی دیکەی خستە ناو گۆڕەپانی سیاسیی، شەپۆلێکی خۆپیشاندان و ناڕەزایەتی گەورە ناوەڕاست و باشوری عێراقی گرتوەتەوە.

هۆکارەکانی سەرهەڵدانی شەپۆلێكی نوێ لە خۆپیشاندان و ناڕەزایی کە لە پارێزگاكانی باشوری عێراق، بەتایبەت كە لە شاری بەسڕە-ی ناسراو بە پایتەختی ئابوری لە (7)ی تەموز دەستی پێكرد، بریتین لە خراپی بواری گوزەرانی خەڵك، بێكاری، نەبونی ئاو و كارەباو خزمەتگوزارییە سەرەتاییەکان. فراوانبونی بازنەی ناڕەزایەتیەکان توندوتیژی و هەڵكوتانە سەر دامەزراوە دەوڵەتیەکان و بارەگای پارتە سیاسیەکانی لێکەوتەوە و، کوژراو و برینداربونی دەیان خۆپیشاندەری بەدوای خۆیدا هێنا.

پەیوەندیدار بە هەلومەرجی ژیانی پارێزگاکانی سونەنشین و هەرێمی کوردستان، چاودێران و ناوەندەکانی میدیا پرسیاری فراوانبون و درێژبونەوەی ناڕەزایەتیەکان بەرەو ئەو ناوچانە دەوروژێنن، بەتایبەت کە دەوترێت هۆکارەکانی سەرهەڵدانی خۆپیشاندانەکانی ناوەڕاست و باشوری عێراق لە هەرێم و ناوچەکانی دیکەش هەیە، بەڵام بەهۆی ئەوەی پارێزگا سونینشینەکان هێشتا ئاسەوارەکانی جەنگی داعش بە چڕی تێیدا ماوەتەوە و ژمارەیەکی زۆری دانیشتوانیان لە کەمپەکاندا ژیان دەگوزەرێنن بە دور دەزانرێ ئەگەری خۆپیشاندان لەلایەن خەڵكی سنونەوە لە ئارادا بێت.

لەلایەکی دیکەشەوە، هەرێمی کوردستان ئەزمونێکی دەوڵەمەندی لەگەڵ بزاوتی ناڕەزایەتی جەماوەری هەیە و لە حەوت ساڵی رابردودا بە دەیان خۆپیشاندان و شەپۆلی ناڕەزایەتی پارێزگای سلێمانی بە تایبەتی و ناوچەکانی دیکەی هەولێر و دهۆکی گرتوەتەوە، هەربۆیە ژمارەیەک لە میدیای کوردی و عێراقی ئاماژەیان بەوەکردوە بە دور نازانرێت لە ئەگەری درێژەکێشانی خۆپیشاندانەکانی ناوەڕاست و باشوری عێراق دەنگی ئەم جۆرە لە ناڕەزایەتی لە هەرێمی کوردستان بەرز ببێتەوە.

دوێنێ و ئەمڕۆ (20 و 21ی تەموزی 2018) خۆپیشاندان و ناڕەزایەتیەکان لەسەر ئاستی بەغدای پایتەخت و بەسرە و حەوت پارێزگای دیکە زۆر فراوان بوە و لەگەڵ بەرزبونەوەی پلەی گەرما توڕەیی خەڵکیش زیاد دەکا و، هێزەکانی پۆلیس و جیهازی ئەمنی عێراقیش روبەڕوی خۆپیشاندەران بونەوە و کوژراو و بریندار هەیە. لەم دۆخە ئاڵۆزەدا پرسیارەکە ئەوەیە ئەم دەسەڵاتە فاسدەی لەعێراق هەیە، رەوایەتی لە خەڵكەوە وەرگرتوە، یان هۆکاری دەرەکی رایگرتوە؟ واتە دەکرێ چاوەڕێ بین بە فشاری جەماوەری بڕوخێن، یاخود داواکارییەکانی خەڵک جێبەجێ بکەن؟!