دوانیوەڕۆی
ئەمڕۆ هەینی بە ئامادەبونی رێكخەری گشتی بزوتنەوەی گۆڕان بە وەكالەت، بەبەشداری
بەشی هەرە زۆری سەركردە سیاسی و هەڵسوڕاوە دیارەكان و جڤاتی نیشتمانی و گشتی و
ژمارەیەكی زۆر لە هەڵسوڕاوان، مەكۆی سەرەكی بزوتنەوەی گۆڕان لە گەڕەكی كوردساتی
شاری سلێمانی كرایەوە.
هەواڵ:
(KNNC)
چۆمان
محەمەد، سەرۆكی لیستی (114)ـی بزوتنەوەی گۆڕان لە بازنەی سلێمانی لە وتەیەكدا كە
لە رێوڕەسمی كردنەوەی مەكۆی نوێی سەرەكی بزوتنەوەی گۆڕان پێشكەشی كرد رایگەیاند:
سەرباری ئەو ئاڵنگارییانەی خراونەتە سەررێی بزوتنەوەی گۆڕان، بەڵام بزوتنەوەی
گۆڕان بەئامانجی سەرەتایەكی نوێ كار بۆ خەباتی مەدەنی و پەرلەمانی دیموكراسی، دەست
پێدەكاتەوە، گۆڕان بەجیاواز لە حزبە سیاسییەكانی هەرێم؛ داوای لێبوردنی لە
دەنگدەران، لایەنگران و هاوڵاتیانی هەرێمی كردوە.
كاندیدی
ژمارە (1)ـی بزوتنەوەی گۆڕان لە بازنەی سلێمانی رونیكردەوە؛ بەپێچەوانەی لایەنە
سیاسییەكانی دیكەی هەرێم كە ژیانیان پڕە لە خیانەتی نیشتیمانی ودروستكردنی كێشە و
قەیران بۆ ژیانی هاوڵاتیان، گۆڕان بۆ كەموكورتییەكانی داوای لێبوردنی كردوە ئەوەش
جێگەی شانازییە بۆ بزوتنەوەكە و گۆڕانخوازان و تیشی: بەڵێن دەدەین بەهەمان گڕوتینی
هەڵمەتەكانی هەڵبژاردنی ساڵی (2009) و لەژێر بەیداخە نیلییەكانی رەوانشاد
نەوشیروان مستەفادا لەگەڵ كەسانی دڵسۆز و هەڵسوڕاوانی زویر كە رۆژانە پشتیوانی لە
بزوتنەوەی گۆڕان دەكەن كۆببینەوە و لە بەرەی گەندەڵی و شكستخواردو دوربكەوینەوە.
دواتر
كاندیدانی بزوتنەوەی گۆڕان جەختیان لە پێداگری لە بەرنامەی سیاسی بزوتنەوەی گۆڕان
كردەوە و دوپاتیان كردەوە درێژە بەو رێباز و خەباتە دەكەن كە بزوتنەوەكەی لەسەر
دامەزراوە.
490 جار خوێندراوەتەوە