ئەمڕۆ لە جیهاندا رۆژى جیهانیی مامۆستایان بەرز رادەگیرێت و یادى دەکرێتەوە، لە هەرێمى کوردستانیش یەکێتیی مامۆستایان داوا دەکات، پێویستە هەرچی زوە، کێشەی موچە چارەسەر بکرێت و مانگانە لە وادەی خۆی دابەش بکرێت.

 

هەواڵ:KNNC

 

یەکێتیی مامۆستایانی کوردستان، بەبۆنەى رۆژی جیهانیی مامۆستاوە، بەیاننامەیەکی بڵاو کردەوە و تێیدا داوا دەکات، چارەسەری كێشەی موچە  بکرێت و مانگانە لەکاتی خۆیدا دابەش بکرێت، هەرچی زویشە پلەبەرزكردنەوەی مامۆستایان و فەرمانبەران دەست پێبكاتەوە.

 

داواش دەکات: مامۆستایانی گرێبەست بە هەمیشەیی بکرێن و هەمو هەوڵێکیش بدرێت بۆ ئەوەی مامۆستایان و فەرمانبەران لەهەمو ئەو پێشینانە سودمەندبن کە لە بانقە فەرمییەكان دەدرێت.

 

لە بەیاننامەکەى یەکێتیی مامۆستایاندا ئەوەیش هاتوە: پێویستە بەزووترین كات، زەوی بەسەر مامۆستایان و فەرمانبەران دابەش بكرێت و راستەوخۆ خزمەتگوزاریان پێ بگات.

 

رێکخراوی پەروەردەی نێودەوڵەتیش بە بۆنەی رۆژی جیهانیی مامۆستایانەوە لە بەیاننامەیەکدا داوا لەسەرجەم وڵاتان دەكات، گرنگی بە دەنگ و بەهای مامۆستایان بدەن و كوالێتیی پەروەردە بەرەوپێش ببەن.

136 جار خوێندراوەتەوە