دەزگای ئاسایشی هەرێم رایگەیاند، هێزەکانیان بۆ رێگریکردن لە تەشەنەسەندنی ئاڵۆزییەکان چونەتە خێمەی مامۆستایان و رێکاریی یاساییان گرتوەتەبەر.

هەواڵ:KNNC

لە راگەیەنراوێکی دەزگای ئاسایشی هەرێمدا هاتوە، دوای ئەوەی شەوی رابردو لە نزیک شارۆچکەی عەربەت، بەهۆکاری رێگریکردن کە تێپەڕبونی ژمارەیەک بارهەڵگر لەلایەن مامۆستایان و هاوڵاتییان، بوەتەهۆی دروستبونی گرژی و ئاڵۆزی لە نێوانیاندا و چەند شۆفێر و هاوڵاتییەک برینداربون.

ئاماژەی بەوەشکردوە، وەک لایەنی جێبەجێکاری یاسا دەستبەجێ هێزەکانیان بەمەبەستی کۆنتڕۆڵکردنی ئەو بارودۆخە نەخوازراوە و رێگریکردن لە تەشەنەسەندنی ئاڵۆزییەکان و سەلامەتی گیانی هەمو لایەک، گەیشتنە شوێنی روداوەکە و رێکاریی یاسایی گرتوەتەبەر بۆ هێورکردنەوەی بارودۆخەکە.

باسی لەوەشکردوە، له ئيستادا هيچ كەس دەستگيرنەكراوه و بريندارەكان نەخۆشخانەیان جێهێشتوە.