شەوی ڕابردو گرژی لە نێوان مامۆستایانی ناڕازی و شۆفێرانی بارهەڵگری سوتەمەنی لەسەر ڕێگای عەربەت – سلێمانی دروست بو، هێزێكی ئەمنیش بە بەکارهێنانی توندوتیژی بڵاوەی بە خۆپیشاندانەکانی مامۆستایان کرد.

هەواڵ:KNNC


دوای دروستبونی ئاڵۆزییەکان و بۆ بڵاوەپێکردنی خۆپیشاندانەکانیش هێزێكی ئەمنی رەوانەی ناوچەکە کران و ژمارەیەك لە مامۆستایان و رۆژنامەنوسان دەستگیر کران. 

لەلای خۆشیەوە، عوسمان گوڵپی مامۆستای ناڕازی رایگەیاند : هێزە ئەمنییەکان بە فشارێکی زۆر و توندوتیژی رێگای تەنکەرەکانیان کردەوە.

بە گوێرەی زانیارییەکانی کەی ئێن ئێن: لە ئێستادا هێزێكی ئەمنی لە شوێنی خۆپیشاندانەکان جێگیرکراوە بەمەبەستی ڕێگریکردن لە خۆپیشاندان.

کەی ئێن ئێن زانیوشیەتی، دوای دەستگیرکردنی ژمارەیەك لە مامۆستایان و رۆژنامەنوسان، دوایین مامۆستای ناڕازی کە ئازادکراوە کاتژمێر 05:00ـى بەرەبەیانی ئەمڕۆ بوە.

هەر بە گوێرەی زانیارییەکان هێشتاش کەلوپەلە رۆژنامەوانییەکانی میدیاکان و ئۆتۆمبێل و مۆبایلی مامۆستایانی ناڕازی لەلایەن ئاسایشەوە دەستی بەسەردا گیراوە.