وەزارەتی دەرەوەی عێراق پێشوازی لە پەیامەکەی عەبدوڵا ئۆجەلان دەکات، راشیگەیاند، دەستپێشخەرییەکە هەنگاوێکی گرنگە بۆ بەرزکردنەوەی ئاسایش لە ناوچەکە.

هەواڵ:KNNC

وەزارەتی دەرەوەی عێراق، لە بەیاننامەیەکدا رایگەیاند، پێشوازی لە پەیامەکەی عەبدوڵا ئۆجەلان دەکەن بەتایبەت کاتێک داوای چەکدانان پەکەکە دەکات، چونکە ئەوە بە هەنگاوێکی گرنگ و ئەرێنی دەزانن پەیوەست بە سەقامگیری ناوچەکە.

وەزارەتەکە، دەستپێشخەرییەکەی ئۆجەلان بە گرنگ دەزانێت بۆ بەرزکردنەوەی ئاسایش، نەک تەنها لە عێراق، بەڵکو بۆ تەواوی ناوچەکە.

جەختیلەوەشکردوەتەوە، چارەسەری سیاسی و دیالۆگ باشترین رێگەیە بۆ چارەسەرکردنی ناکۆکییەکان و کۆتایهێنان بە ململانێکان، بەشێوەیەک کە خزمەت بە بەرژەوەندییەکانی هەمو لایەنەکان بکات و پێکەوەژیانی ئاشتییانە بەرەو پێشببات.

وەزارەتی دەرەوەی عێراق، پشتیوانی خۆی بۆ هەمو هەوڵەکان بە ئامانجی چارەسەرکردنی کێشەکان لەرێگەی گفتوگۆوە دوپاتکردوەتەوە و هیواخوازە ئەو بانگەوازە بکرێت بە هەنگاوێکی کردەیی و خێرا بۆئەوەی حزبەکان چەکەکانیان دابنێن.