ئەندامێکی کۆنسەری سەرۆکایەتی کەجەکە ڕایگەیاند، پرسی چارەسەری کورد لە باکوری کوردستان تەنیا پرسێکی ناوخۆیی تورکیا نیە و بوەتە پرسێکی جیهانی، ئاشکراشیکرد لیژنەیەکی یاسایی دامەزراوە بۆئەوەی پڕۆسەکە چوارچێوەی یاسایی بەخۆیەوە بگرێت. 

هەواڵ:KNNC


زوبەیر ئایدار، لە چاوپێکەوتنێدا لەگەڵ میدیای نزیک لە حیزبەکەی ڕایگەیاند، بانگەوازەکەی عەبدوڵا ئۆجەلان، نیشانەی دەستپێکی قۆناغێکی نوێیە و ئیتر چارەسەری پرسی کورد تەنیا پرسی ناوخۆیی تورکیا و ڕۆژهەڵاتی ناوەڕاست نیە، بەڵکو بوەتە پرسێکی جیهانی.

بەرپرسەکەی کەجەکە ئاماژەی بەوەشکرد، لێژنەیەکی یاسایی دامەزراوە و ئەو لێژنەیە کار لەسەر پرسە یاسایی و دەستوریەکان دەکات و پێش بڵاوبونەوەی بانگەوازەکەی ئۆجەلان، ئەو لیژنەیە لەگەڵ هەندێک بەرپرسی حکومەتی تورکیا سەردانی ئیمراڵیان کردبو لێکتێگەیشتن هاتوەتە ئاراوە. 

وتیشی، ئەم پڕۆسەیەی ئێستا پڕۆسەیەکی نیشتمانی و پێشوەختە بلانی بۆ دانراوە و ئامادەکراوە و لەلایەن ئەردۆغانەوە پاڵپشتی دەکرێت و شتێک نیە کە بە سڵاوکردنێکی دەوڵەتی باخچەلی لەگەڵ پەرلەمانتاری دەمپارتی هاتبێتە ئاراوە.