رێبەری پەکەکە بە بۆنەی رۆژی جیهانی ژنانەوە، پەیامێکى نوێی بڵاو کردەوە و رایگەیاند، بانگەوازیی ئاشتی و کۆمەڵگەی ئازاد بۆ ژنان رێنیسانسە و وتیشی:پرسی ژنان قوڵترە لە پرسی کورد. 

هەواڵ:KNNC

عەبدوڵا ئۆجەلان، رێبەری زیندانیكراوی پەکەکە بە بۆنەی 8ی مارس، رۆژی جیهانی ژنان، لەڕێگەی شاندی ئیمڕاڵییەوە پەیامێکی بۆ ژنان بڵاوکردەوە و دەڵێت: رۆحی ئەم سەردەمە سیاسەتی دیموکراسییە، زمانی ئەم سەردەمەش زمانی ئاشتییە و بانگەوازی ئاشتی و کۆمەڵگەیەکی ئازادیش رێنێسانسێکە بۆ ژنان.

دەشڵێت: پرسی ئازادی ژنان هێشتا گرنگی خۆی پاراستوە و تا کەلتوری دەستدرێژی سێکسی لەناو نەچێت، حەقیقەتی کۆمەڵایەتی ژنان لە بواری زانستی و جوانکاری و ئایینیدا سەرهەڵ نادات. 

ئۆجەلان لە بەشێکی دیکەی پەیامەکەیدا ئاماژەی بەوەداوە، پرسی ژنان قوڵترە لە پرسی کورد و کەلتوری شەڕ و ململانێ زۆرتر لە دژی ژنان بڵاوبوەتەوە و لەناوبردنی ئەم کەلتورەش داینەمۆی خەباتی ئێمەیە. 

جەختی لەوەشکردوە، نابێت ژنان تەنیا لە بواری بایۆلۆژیەوە هەڵسەنگێندرێن، بەڵکو دەبێت لە بوارەکانی کەلتری و کۆمەڵایەتی و مێژویی هەڵسەنگێندرێن.