بەرپرسێکی باڵای پەیەدە ئاشکرایدەکات کە رێککەوتنی نێوان فەرماندەی گشتیی هەسەدە و سەرۆککۆماری کاتیی سوریا، لەسەر داواکاریی ئەمەریکا یان هەر وڵاتێکی دیکە ئەنجام نەدراوە و دەڵێت: ئەوان پلان و سیاسەتەکانیان لەسەر بنەمای بونی ئەمەریکا، یان هاوپەیمانان دانانێن. 

هەواڵ:KNNC

ساڵح موسلیم، ئەندامی دەستەی هاوسەرۆکایەتیی پەیەدە، لە چاوپێکەوتنێکدا لەگەڵ رۆژنامەی تورکیا سەبارەت بە رێککەوتنەکەی نێوان مەزڵوم عەبدی و ئەحمەد شەرع، رایگەیاند: ئەو رێککەوتنە لەژێر رێنمایی یان لەسەر داوای ئەمەریکا و وڵاتانی دیکە ئەنجام نەدراوە، هەرچەندە ئەمە بەو واتایە نییە کە لەگەڵ ئەوان راوێژ ناکەن. 

بەرپرسەکەی پەیەدە ئاماژەی بەوەش کرد: ئەوان بە لەبەرچاوگرتنی پێشهاتەکانی سوریا و دینامیکی ناوچەکە، چونەتە دیمەشق و بۆ ئەوەش ماوەیەکەی زۆرە لەگەڵ حکومەتی راگوزەر لە گفتوگۆدان. 

ساڵح موسلیم، جەختی لەوەشکردوە، رێگە نادەن کەس دەستێوەردان لە پێکهاتەی ناوخۆیی و بڕیاری کۆتاییان بدەن و وتیشی: رێککەوتنەکەیان لەگەڵ ئیدارەی سوریا هاوتەریبە لەگەڵ بانگەوازەکەی ئۆجەلان بۆ چارەسی پرسی کورد لە تورکیا.