دواى نزیکەى 40 رۆژ لە دابەشنەکردنى، ئەمڕۆ موچەى بەشێک لە موچەخۆرانى هەرێم دابەش دەکرێت  و بەپێی خشتەکەى وەزارەتى داراییش پرۆسەکە لە شەش رۆژدا کۆتایی دێت.

هەواڵ:KNNC

ئەمڕۆ، بە دابەشکردنى موچەى (خانەشینى شارستانى، خاوەن پێداویستییە تایبەتەکان، زیندانە سیاسییەکان، بەرکەوتوانى چەکى کیمیایی) پرۆسەى موچە دابەشکردن لە هەرێمى کوردستان دواى 36 رۆژ دەستپێدەکات.

رۆژانى هەینى و شەممە، دابەشکردنى موچە بەردەوام نابێت و رۆژى یەکشەممەش، تەنها (کەسوکارى شەهیدان و ئەنفالکراوان و خانەنشینى پێشمەرگە) موچەکانیان وەردەگرن، لە رۆژى دوشەممە و سێشەممەش تەواوى دەستە و بەڕێوەبەرایەتیی و وەزارەتەکان موچەکانیان وەردەگرن.

ئەمە لەکاتێکدایە، دوێنێ وەزارەتى دارایی عێراق بڕى 957,925,880.078 دینارى وەک تەمویلى موچەى مانگى شوبات رەوانە کرد و حکومەتى هەرێمیش تەواوى وەزارەتەکانى راسپارد خشتەى موچەى مانگى ئازار ئامادە بکەن و بە  وتەى حکومەتى هەرێم دەیانەوێت پێش هاتنى جەژنى رەمەزان موچەى مانگى سێش دابەش بکرێت.