بەپێی پێشبینییەكانی كەشناسی لە رۆژی (19ـی ئازارەوە) شەپۆلێكی نوێی باران و بەفر بارین و گەرانەوەی سەرما رو لەهەرێم دەكات و تا رۆژی (26ـی ئازار) بەردەوامی دەبێت.


هەواڵ: (KNNC)


ئاراس جەبار، كەشناس بڵاویكردوەتەوە، بەگوێرەی گۆڕانکارییە نوێكانی نەخشەکانی کەش وهەوا پێشبینی دەکرێت لە رۆژی (19ـی ئازاری 2025) و لە ئەنجامی کاریگەری و هاتنە خوارەوەی نزمەپاڵەپەستۆی جەمسەری باکور، هەرێمی کوردستان  شەپۆلێکی مامناوەندی بارانبارین و بەلاوازیش ناوچەکانی دیکەی عێراق بگرێتەوە.


رونیكردوەتەوە، لەگەڵ ئەو شەپۆلە پێشبینی كراوەدا، لە رۆژی (22ـی ئازار) بارستە هەوا ساردەکەی دەگاتە ناوچەکانی هەرێم و جارێکی دیکە کەشێكی سارد و زستانەی دەستپێدەکاتەوە و لەم قۆناخەشدا پێشبینی بارینی بەفر لە ناوچە شاخاویەکان دەکرێت.


كەشناسەكە ئەوەشی خستوەتەڕو، رێژەی بارانە پێشبینی كراوەكەی سەر ناوچە جیاجیاكانی هەرێم زیاتر و فراوان دەبێت و کاریگەریەکانی بە قۆناغی جیاواز تا رۆژی (26ـی ئازار) بەردەوامی دەبێت.