تەمویلى موچەى مانگى دوو خرایەسەر هەژمارى وەزارەتى دارایی هەرێم و وەزارەتەکەش دەڵێت: سبەینێ دەست بە دابەشکردنەکەى دەکەن و لە چەند رۆژێکدا موچەى تەواوى فەرمانبەران دابەش دەکەن و لە هەوڵیشدان هەفتەى داهاتو لیستى موچەى مانگى سێ رەوانەى بەغداد بکەن.

هەواڵ:KNNC

وەزارەتى دارایی و ئابورى حکومەتى هەرێمى کوردستان راگەیەنراوێکى بڵاوکردەوە و بەوپێیە بڕى 957,925,880.078 دینار وەک تەمویلی موچەی مانگی شوباتی فەرمانبەران و موچەخۆرانی هەرێمی کوردستان خراوەتەسەر هەژماری بانکی وەزارەتەکە و بێ هیچ لێبڕینێک خەرجکراوە.

ئەوەش ئاشکرا کراوە کە سبەینێ پێنجشەممە، دەست بە دابەشکردنى موچەى مانگى شوبات (2)ـى فەرمانبەران و موچەخۆرانى هەرێمى کوردستان دەکەن و لە چەند رۆژێکدا موچەى سەرجەم موچەخۆران دابەش دەکرێت و لە هەوڵیشدان لە هەفتەی داهاتودا لیستی موچەی مانگی ئازار رەوانەی وەزارەتی دارایی حکومەتی فیدراڵ بکرێت.

وەزارەتەکە دەشڵێت: "لەدوای 10ـی هەمو مانگێک راپۆرتی تەرازوی پێداچونەوەی مانگانە ئامادە دەکرێت و لەسەر ئەو بنەمایەش لەم رۆژانەدا راپۆرتی تەرازوی پێداچونەوەی مانگی شوبات ئامادە دەکرێت، بەمەبەستی دیاریکردنی پشکی گەنجینەی فیدراڵی لە داهاتی نانەوتی هەرێمی کوردستان و ناردنی بۆ وەزارەتی دارایی حکومەتی فیدراڵ لەنزیکترین کاتدا."