فەرەنسا پێشوازی لەو رێککەوتنە کرد کە لە نێوان ژەنەراڵ مەزڵوم عەبدی، فەرماندەی گشتی هێزەکانی سوریای دیموکرات (هەسەدە) و ئەحمەد شەرع، سەرۆكی كاتی سوریا واژۆ کراوە و دەڵێت: فەڕەنسا و ئەمەریكا بەشێك بون لە رێككەوتنەكە، هاوكات، ئەڵمانیاش دەڵێت: تێكەڵكردنی هێزەكانی سوریای دیموكرات (هەسەدە) هەنگاوێكی گرنگە بۆ سوریایەكی یەكگرتو.

هەواڵ: (KNNC)


وەزارەتی دەرەوەی روسیا بڵاویكردەوە؛ رێككەوتنی سیاسی لەنێوان هەسەدە و دیمەشق، هەنگاوێكی ئەرێنییە كە تیایدا رەچاوی دانوستان و كۆتایی هێنان بەجەنگ و یەكخستنی ئەو وڵاتە كراوە كە فەڕەنسا و ئەمەریكا بەشێك بون لە رێككەوتنەكەی نێوان مەزڵوم عەبدی و ئەحمەد شەرع.

ئاماژەی بۆ ئەوەشكردوە، فەرەنسا بەردەوام دەبێت لە هەوڵەکانی بۆ ئاسانکاری گفتوگۆ و دیالۆگ لەنێوان  دەسەڵاتدارانی راگوزەری سوریا و هاوبەشە کوردەکان لە باکوری رۆژهەڵاتی سوریا.

هاوكات، وەزارەتی دەرەوەی ئەڵمانیا راگەیەندراوێكی بڵاوكردەوە كە تیایدا هاتوە: تێكەڵكردنی هێزەكانی سوریای دیموكرات (هەسەدە) هەنگاوێكی گرنگە بۆ سوریایەكی یەكگرتو هەروەها بەشداریكردنی سەرجەم پێكهاتەكانی ئەو وڵاتە لەپرۆسەی سیاسیدا.

لای خۆشیەوە، رەجەب تەیب ئەردۆغان، سەرۆک کۆماری تورکیا رایگەیاند: رێککەوتنی کورد و دیمەشق خزمەت بە ئاشتی دەکات و پێشوازی لە ھەر ھەنگاوێكی دروست دەكەن هەروەها جێبەجێکردنی ئەو رێککەوتنەی کە دوێنێ واژۆ کرا بە شێوەیەکی دروست و تەواو، خزمەت بە ئاسایش و ئاسودەیی سوریا دەکات.

پێشتر، سەرۆکایەتی سوریا واژۆکردنی رێککەوتنێکی نێوان هەسەدە و دیمەشقی راگەیاند، بەگوێرەی رێكەوتنەكە كەلە هەشت خاڵ پێكهاتوە، كە یەكێك لە خاڵە گرنگەكانی رێككەوتنە واژۆ كراوەكە تیادا هاتوە؛ پێكهاتەی كورد پێكهاتەیەكی سەرەكی گەلانی سوریایە.