وزیری بەرگری ئیسرائیل رایدەگەیەنێت هێزەکانیان لە غەززە و لوبنان و سوریا دەمێننەوە و نایانکشێننەوە، وەک فشارێکیش بۆسەر حەماس رێگە بە هیچ هاوکارییەکی مرۆی نادەن بچێتە غەززەوە


هەواڵ:KNNC

سەرەڕای بەردەوامی هەوڵەکانی ناوبژیوانان بۆ دەستپێکردنەوەی ئاگربەستە وەستاوەکەی نێوان ئیسرائیل و حەماس، وەزیری بەرگری ئیسرائیل ڕایگەیاندوە؛ لەهەر هەلومەرجێکدا بێت ئەو شوێنانەی دەستیانبەسەردا گرتوە لە غەززە، تێیدا دەمێننەوە و بەجێی ناهێڵن.


جگە لەوەی جەختی کردوەتەوە هێزەکانیان ناکشێننەوە لەو شوێنانەی تێیدان، دڵنیایشی داوە لەوەی بە مەبەستی فشارخستنە سەر حەماس، ڕێگە بە هیچ هاوکارییەکی مرۆیی نادرێت بچێتە غەززە .


ئەمە لەکاتێکدایە لە سەرەتای دەستپێکردنەوەی ئۆپەراسیۆنی ئیسرائیل لە مانگی ڕابردوەوە، هێزەکانی ئیسرائیل دەستیانگرتوە بەسەر ناوچەیەکی فراواندا لە غەززە، ئەم هەنگاوەش بوەتە هۆی ئاوارەبونی  زیاتر لە دوو ملیۆن فەلەستینی لە باشوور و بەدرێژایی کەناراوەکانی غەززە خستوەتە ژێر فشارەوە.

وەزیری بەرگری ئیسرائیل ئەوەشی راگەیاندوە؛ بەپێچەوانەی ڕابردوە، سوپاکەیان  ئەو ناوچانە چۆڵ ناکات کە پاکیانکردوەتەوە  و داگیریانکردوە،  لە دوای شکاندنی ئاگربەستەوە و ئاماژەی بەوەشکردوە سوپاکەیان لە ئێستادا لە 30٪ی غەززەی بەتەواوەتی کۆنتڕۆڵ کردوە بەردەوامیش دەبن بۆ فراوانترکردنی ناوچەکانی ژێردەستیان و جەختیشیکردوەتەوە؛ هیچ مەترسییەکی حەماسیان لەو ناوچانە نەهێشتوە.

کاتز ئاماژەی بەوەشکردوە، سوپای ئیسرائیل نەک تەنها لە غەززە بەڵکو لە لوبنان و سوریاش ناوچەی ئەمنی دیاریکردوە، کە وەک بەربەستێک لە نێوان دوژمندا دەمێنێتەوە.