موچەى مانگى رابردوو تائێستا بەسەر فەرمانبەرانى عێراقدا دابەشنەکراوە و ئامادەکارى دەکرێت بۆ بانگهێشتکردنى وەزیرى دارایى.

 
زیاتر لە ١٠ رۆژ بەسەر مانگى تەممووزدا تیپەڕیوە و تائێستا موچەى مانگى حوزەیرانى فەرمانبەرانى عێراق نەدراوە، بۆ زانینى هۆکارى دواکەوتنەکەش ئامادەکارى دەکرێت بۆ ئەوەى وەزیرى دارایى بانگهێشت بکرێت.

ئەحمەد سەفار، ئەندامى لیژنەى دارایى عێراق رایگەیاند، جموجوڵ و داواکاریى لە پەرلەمان دەستیپێکردووە بۆ میوانداریکردن عەلى عەلاوى وەزیرى دارایى لە رۆژانى داهاتوودا بۆ ئەوەى هۆکارى دابەشنەکردنى موچەى فەرمانبەران بزانرێت، چونکە پارەى پێویست لەبەردەستە و حکومەتیش قەرزى کردووە، بەڵام تائێستا موچەى مانگى رابردوو دابەشنەکراوە.

ئاماژەى بەوەشکردووە، دابەشنەکردنى موچە کاریگەرى خراپى لەسەر ژیانى فەرمانبەران هەبووە و پێویستە لەسەر پەرلەمان بزانێت کە بۆچى موچە نەدراوە، هەرچەندە گرەنتى سێ مانگى داهاتووى موچە کراوە.

بەهۆى دابەزینى نرخى نەوتەوە حکومەتى عێراق و هەرێم رووبەرووى کێشە دارایى بوونەتەوە و ئەوەش بەهۆى دابەزینى نرخى نەوت کە سەدا ٩٥ى داهاتى هەردوولا پێکدەهێنێت.