بەڕێوەبەرانى بانکى رەشید و رافیدەین بانگهێشتى ئەنجومەنى نوێنەرانى عێراق دەکرێن و پرسى دواکەوتنى بەئەلیکترۆنیکردنى موچەى فەرمانبەرانى هەرێمیان لەگەڵدا تاوتوێ دەکرێت.

هەواڵ:KNNC

لیژنەى دەستپاکى ئەنجومەنى نوێنەرانى عێراق لە بانگهێشتنامەیەکدا هەریەکە لە بەڕێوەبەرانى گشتى بانکەکانى رەشید و رافیدەینیان بانگهێشت کردوە.


بەپێی بانگهێشتنامەکە، هۆکارى بانگکردنى ئەم دوو بەڕێوەبەرە بۆ دواکەوتنى ئەنجامدانى پرۆسەى بە ئەلیتکرۆنیکردنى موچەى فەرمانبەرانى هەرێمى کوردستان دەگەڕێتەوە و کۆبونەوەکەى ئەم لیژنەیە بڕیارە سبەینێ کاتژمێر 12:00ـى نیوەڕۆ بەڕێوەبچیت.

دوو مانگ لەمەوبەر و لە 21/2/2024 دادگاى فیدراڵى عێراق بڕیاریدا بە نایاساییبونى نەناردنى موچەى فەرمانبەرانى هەرێم و بڕیاریدا کە پێویستە موچەى فەرمانبەران لە هەرێمى کوردستان بە ئەلیکترۆنى بکرێت و ئەم بڕیارەش کێشەى لەنێوان هەرێمى کوردستان و بەغداد لێکەوتەوە، دواجار بڕیاردرا مانگانە موچە لە بەغدادەوە بنێردرێت بۆ هەرێم تا ئەوکاتەى پرۆسەى بە ئەلیکترۆنیکردن لەڕێی دوو بانکى عێراقییەوە کۆتایی دێت.