نرخى ئەمپێرەکانى کارەباى موەلیدەى ئەهلى لەناو شارى هەولێر و دەوروبەرى دیاریکرا، بەپێی کاتى کارکردن و نرخى سوتەمەنیش نرخەکەى لە شوێنێکەوە بۆ شوێنێکى دیکە جیاوازە.

هەواڵ:KNNC

خۆران خۆرانی، بەرپرسی لیژنەی موەلیدە ئەهلییەکان لە شارى هەولێر  بە کەى ئێن ئێن،ی راگەیاند: بەپێی کاتژمێرەکانى کارکردنى موەلیدەکاتى ناوشارى هەولێر کە لەنێوان 205 کاتژمێر تا 298 کاتژمێر بوە، نرخى ئەمپێرەکان دیاریکراون.

ئاماژەى بۆ ئەوەکرد کە لەناو شار، نرخى هەر ئەمپێرێک لەنێوان هەشت هەزار و 750 تا 12 هەزار و 750 دینار دیاریکراوە، لە بەشێک لە گەڕەکەکانیش کە 305 کاتژمێر کاریان کردوە نرخى ئەمپێرێک دەگاتە 13 هەزار دینار.

لەبارەى نرخى ئەمپێرەکان لە دەوروبەرى شارى هەولێر وتى: موەلیدەکان لەو ناوچانە لەنێوان 125 کاتژمێر تا 330 کاتژمێر کاریان کردوە، هەربۆیە لە دەوروبەرى شارى هەولێر نرخى ئەمپێرێک کارەباى موەلیدە لەنێوان شەش هەزار تا 13 هەزار و 500 دینار دەبێت.


هەولێر/ محەمەد ئەحمەد