پشوی ئەو فەرمانبەرانە درێژکرایەوە کە بەمەبەستی بەشداریکردن لە پرۆسەی سەرژمێری گشتی دانیشتوان گەڕاونەتەوە ناوچە کوردستانییەکان.

هەواڵ:KNNC

هێمن میرانی بەڕێوەبەری گشتی دیوانی وەزارەتی ناوخۆی هەرێم رایگەیاند، ژووری عەمەلیاتی سەرژمێری لە هەرێمی کوردستان پشووی سەرژمێری بۆ ئەو فەرمانبەر و ئەفسەر و کارمەندانە درێژکردەوە کە خەڵکی ناوچە کوردستانییەکانی دەرەوەی ئیدارەی هەرێمی کوردستان (سنوری ماددەی 140ن) و بۆ بەشداریکردن لە سەرژمێری گەڕاونەتەوە ناوچەکانی خۆیان.

دەشڵێت: پشوی ئەو فەرمانبەر و ئەفسەر و کارمەندانەی خەڵکی ناوچەکانی سنوری ماددەی 140ن بۆ بەشداریکردن لە پرۆسەکە گەڕاونەتەوە ناوچەکانی خۆیان، تاوەکو 10ـی کانونی یەکەم درێژدەکرێتەوە بۆ ئەوەی فۆرمی دوەم لە دوای قەدەغەی هاتوچۆ پڕبکەنەوە.

هێمن میرانی دەشڵێت: لەدوای تەواوکردنی فۆرمی یەکەم کە لە رۆژانی 20و 21ی مانگ پشتراست دەکرێنەوە، قۆناغێکی دیکە دەست پێدەکات کە پرسیار و زانیاری زیاتری تێدایە و پێویستە لەو کاتەی بژمێرەکان سەردانی خێزانەکان دەکەنەوە لایەنی کەم یەکێک لە ئەندامانی خێزان لەو شوێنانە بمێننەوە و هەموو بەڵگەنامەکانی ئەندامانی خێزانەکەیانی لابێت و فۆرمی دووەم بە دروستی پڕبکەنەوە، بۆیە رێگە بەو کەسانەش دەدرێت لە ناوچەکانیان بمێننەوە.

حکومەتی هەرێمی کوردستان، پشووی ئەو کەسانە بە کراوەیی دەهێڵێتەوە و دەرفەتییان دەدرێتێ تا ئەو کاتەی بژمێرەکان دووبارە سەردانیان دەکەنەوە تاوەکو هەمو پرۆسەی سەرژمێری تەواودەبێت.