نرخی زێڕ بەرزبونەوەیەکی مێژویی تۆمارکرد، ئۆنسەیەک نزیک دەبێتەوە لە 3500 دۆلار.

ئابوری:KNNC

ئەمڕۆ سێشەممە، لەگەڵ کردنەوەی بازاڕە داراییەکانی ئاسیا، نرخی زێڕ بە بە ڕێژەی 1.8% بەرزبوەوە و گەیشتە 3486.39 دۆلار بۆ هەر ئۆنسەیەک و بەرزترین ئاستی تۆمارکرد.

هاوکات، بەپێی داتاکانی ئاژانسی ڕۆیتەرز، نرخی ئایندەی زێڕی ئەمریکا بە ڕێژەی 1.9% بەرزبوەتەوە و گەیشتوەتە سێ هەزار و 492 دۆلار.

نرخی زێڕ لەمساڵدا زیاتر لە 32% بازدانی بەخۆیەوە بینیوە، گرژییە بازرگانییەکان بازاڕەکانی تێکداوە و کاریگەری لەسەر بەرزبونەوەی کانزا زەردەکە هەبوە.

ئەم بەرزبوونەوەیە بێ وێنەیە بەهۆی لاوازی دۆلار و دوای هێرشەکانی دۆناڵد ترەمپ سەرۆکی ئەمەریکا بۆسەر جیرۆم پاول، سەرۆکی یەدەگی فیدراڵی، کە ئەوەش نیگەرانییەکانی زیاتر کرد و ترس لەوە هەبو، لەکارەکەی دوربخرێتەوە.