سندوقی دراوی نێودەوڵەتی رایدەگەیەنێت: بەهۆی شەڕی بازرگانییەوە، لە ساڵی (2025)ـدا گەشەی ئابوری جیهانی بەرێژەی (2.8%)  دادەبەزێت.


ئابوری: (KNNC)


ئەمڕۆ سێشەممە، لە بڵاوكراوەیەكدا سندوقی دراوی نێودەوڵەتی ئاشكرایكرد، بەهۆی سەپاندنی رەسمی گومرگی و باج لەلایەن دۆناڵد ترەمپ، سەرۆكی ئەمەریكا لەسەر ئەو كاڵاوشمەكانەی لەلایەن وڵاتانەوە هەناردەی ئەمەریكا دەكرێن، کاریگەری بەرچاو لەسەر خاوبونەوە و گەشەسەندنی ئابوری جیهانی دروست دەكەن.


دامەزراوەکە کە بنکەکەی لە واشنتۆنە، ئاماژەی بۆ ئەوەشكردوە، ئاڵۆزی و ناجێگیری خێرای دۆخەكە، لە دوایین پێشبینییەکانیەتی، بۆیە بەپێی پێشبینییەكان پێدەچێت گەشەی ئابوری جیهانی لە ئەمساڵدا (2.8%) داببەزێت، ئەوە لە كاتێكدایە كە بەراورد بە خەمڵاندنی مانگی یەک (0.5%) خاڵ پێداچونەوەی بۆ کراوە.


پێشتر و لە رۆژی (2ـی نیسانی 2025) دۆناڵد ترەمپ، سەرۆکی ئەمەریکا رایگەیاند: باکێجێکی گەورەی باج بەسەر هەمو وڵاتان دەسەپێنێت، بەتایبەت ئەو وڵاتانەی نا هاوسەنگی بازرگانییان هەیە واتە قەبارەی هەناردەیان بۆ ئەمەریکا زۆر زیاترە لە قەبارەی هاوردەیان.