هەموو مرۆڤێك خاوەنی كەسێتیەكی  دیاریكراوی  خۆیەتی  كە هەڵقوڵاوی  هەناوی پەروەردەی خێزانە، بەتایبەت دایك و باوك، چونكە ئەوان پلانی پەروەردەكەی ڕێكدەخەن و ئاراستەی دەكەن، پێ بەپێ‌  لەگەڵ  گەشەكردنیدا ئاوێتەی پەروەردەی كۆمەڵگە دەبێت، لەناو ئەو ژینگەیەشدا مەڵۆی گەشەكردن و بەریەككەوتنی ئەو ئاراستە جیاوازانە، زۆرجار شێواوی و دەرچوون لە ڕێچكەی ڕاستی پەروەردە بەدیدێت، بەڵام ئەگەر گەشەی پەروەردەی خێزان و كۆمەڵگە هاوسەنگ و تەریب بوون، ئەوە لەو كاتەدا تاكێكی  پەرەوردەی ئاراستەكراوی گونجاو ڕەنگدەداتەوە، كە باشی و چاكیەكەی بۆ خۆی و كۆمەڵگەكە دەبێت، ئەتوانین ئەوە بە پلانێكی پەروەردەیی زانستی لەقاڵب بدەین، لەو كاتەشدا، ئەو زانستە  باشی و چاكەیە، وتەكەی (نیچەی  فەیلەسوف 1844- 1900)  یەكانگیری ئەو بابەتە دەبێت، كە دەڵێ‌: (خێرو چاكەی زانست بۆهەمووانە نەك  بەتەنها بۆ تاكێك).

تاكێكی خاوەن ئیرادە و كەسێتییەكی  بەهێز، لەكۆمەڵگە  شارستانی و  پێشكەوتووەكاندا، هەمیشە  هێمای جوانی ژیان و مامەڵەی  دروستی كۆمەڵایەتی  دەردەكەوێت، بەڵام لە كۆمەڵگە  وابەستەو دواكەوتووەكاندا، ئەوە بەدیناكرێت، ئەگەر لە ناو ئەو  ووڵاتانەی  سیستەمێكی  باشی  پەرەوردەیی و حوكمڕانییەكی تەندروست و  دیمۆكراسی  وەك شنەی شەماڵ  بەسەر كۆمەڵدا بشنێتەوە، بێگومان تاك دەبێتە تاكێكی داهێنەرو خاوەن ئیرادەو بڕیاردانی دروست و خاوەن پلانی  گونجاو، كە هەمیشە شانازی بە مرۆڤ بوونی خۆی دەكات و مامەڵەی مرۆڤانە بە هەست و سۆزو خۆشەویستی و لێبوردەیی ئەنجام دەدات.

ئەوەی مەبەستمە زیاتر  لەسەر كەسێتی تاكی كورد لەسایەی حیزبی كوردیدا لێی بدوێم و هەڵوێستەی لەسەر بكەم ، چونكە لەم هەرێمەدا هەموو تەوەرو سێكتەرەكان بە لینكێكی بەهێزەوە بە حیزبەكانەوە بەستراون، چونكە حیزب بۆتە ئەو بەشەی كە سەرەوەی هەڕەمی  كۆمەڵگەی گرتووەو ئەو خاوەنی بڕیارو پەروەردەو ئابوری و ئیدارەدانە، بەداخەوە ئەمەش نیشانەی خراپی بەدیهێنانی  بەهێزی كەسێتی تاكە،لەم سێ‌ دەیەی حوكمڕانی كوردیدا وەك ئەوەی هیچ خەمخۆرو دڵسۆزو  كەسانێكی  حاوەن پلان و ئەزموون نەبوبن ، یان گوێ‌ بەهیچ نەدراوە و كار بە پلان و بەرنامەو ویستی چاكەكاران نەكراوە، بۆیە حیزبەكان بوونەتە  ئەو مۆتەكەیەی  خەوو خەونی خۆشی ژیانی كۆمەڵگەیان  زڕاندووە و كەسێتی  تاكی كوردیان واتێكشاندووە، وەك ئەوەی  بوونی ئەو تاكانە لەسایەی  حیزب و سەركردەكانەوەیە، ئەگەر ئەوان نەبوونایە ، ژێردەستەی دوژمنانی  كورد ئەبوون، یان مادام ئەوان ماوەیەك خۆیان بە خەباتكردن خەریك كردووە، ماندووبونەكەیان بۆخەڵك بووە و خەڵكیش دەبێ ئەو قەرزەیان بدەنەوە، كەئەم خوێندنەوەو منەتە دوورە لە یاساو ڕێسای دروستی ژیان و پەروەردەی سەردەمیانەو هاوچەرخ.

لەبەرنامەو پەیڕەوی هەموو حیزبەكانی كوردستان، ئاماژە بەوە كراوە، حیزب هۆكارە بۆ خزمەتی خەڵك و ئامانجی باڵا تەنها ڕزگاری مرۆڤ و نیشتمانە، بەڵام دوورلەو بڕگەیە هیچ كات تاك و نیشتمان  نەخراونەتە بازنەی خزمەتكردنی حیزبەكان، بگرەو خاك و تاك وەك خزمەتكار لەیەردەم بەرپرسانی حیزب و سەركردەكانیان نمایشكراون ، لەو كاتەشدا وەلای تاكی حیزبی بۆ سەرۆكەكەی بەرزتر ئەبێت لە هی خەڵك و نیشتمانەكەی، حیزبەكان هیچ كات  نەیانویستوە، تاكێكی ئازاو ئازاد بوونی هەبێت، چونكە كە تاك ئازاد بوو دوورئەبێت لە وابەستەیی و كۆیلە بوون و ئەبێتە خاوەنی ئیرادەیەكی بەهێزو ڕەخنەگر، كە حیزبیش دەرەقەتی ئەم بۆچوونە نایەت، چونكە كەس بەدەوریەوە نامێنێ‌ و ئامانجە تایبەتیەكان  لەسایەی ئەو تاكە ووشیارەدا نایەنەدی، كاتێ‌ تاك وشیاربێت كاتەكانی خۆی بە شتی بەكەڵك و بەسود پڕدەكاتەوە، وەك (برتراند راسل 1872- 1970) نوسەرو هونەرمەند و سیاسەتكار و فەیلەسوف دەڵێ‌: (توانای  پڕكردنەوەی كاتە بەتاڵەكان بە ووریایی، بەرزترین ئاستە بۆ ڕۆشنبیری تاك) لێرەوە ئەوەمان بۆ ڕوون دەبێتەوە كە بۆچی حیزبەكان نایانەوێ‌  تاكی كورد خاوەن ئیرادەو كەسێتی  بەرزی خۆی بێت.