بازرگانێکى عێراقى و خاوەنى کۆمپانیاى ئەلرەیان بۆ هاوردەى ئامێرى کارەبایی، لە هێرشەکەى سەر ماڵى پێشڕەو دزەیی گیانى لەدەستداوە.

هەواڵ:KNNC

پەیامنێرى کەى ئێن ئێن رایگەیاند؛ لە هێرشەکەى شەوى رابردو بۆسەر ماڵى پێشڕەو دزەیی، کەرەم سەریدار، خاوەنى کۆمپانیاى ئەلرەیان بۆ هاوردەى ئامێرى کارەبایی و یەکێک لە خاوەن پشکەکانى کۆمپانیاى سامسۆنگ و هاوکات وەبەرهێن لە شارى دوبەى، گیانى لەدەستداوە.

ئاماژەى بۆ ئەوەشکرد کە ئەم بازرگانە ساڵى 1981 لە وڵاتى بەریتانیا لەدایک بوە و دانیشتوى شارى دوبەى بوە، بەڵام لە هێرشەکەى سوپاى پاسداران بۆسەر ماڵى پێشڕەو دزەیی گیانى لەدەستدا.


شەوى رابردو لە شارى هەولێر چى رویدا؟

نزیک کاتژمێر 12:00ـى شەوى رابردو لەلایەن سوپاى پاسدارانى ئێرانەوە بە 10 موشەک شارى هەولێر کرایە ئامانج، یەکێک لە ئامانجەکانى ئێران ماڵى پێشڕەو دزەیی بو کە خاوەنى کۆمپانیاى فالکۆن-ە و لە ئەنجامدا ئەو بازرگانە کوردە و منداڵە یەک ساڵ و نیوەکەى گیانیان لەدەستدا و هاوڕێیەکیشى کە بازرگانێکى عێراقییە گیانى لەدەستدا.

لەبارەى هێرشەکەوە سوپاى پاسدارانى ئێران سەرەتا و درەنگانى شەوى رابردو ئەنجامدانى هێرشەکەى گرتە ئەستۆ و رایگەیاند: بنکە سیخوڕییەکان و شوێنى کۆبونەوەى گروپەکانى دژ بە ئێران کرانە ئامانج.

هاوکات بەیانى ئەمڕۆ هەر لەبارەى هێرشەکەوە سوپاى پاسداران لەگەڵ بڵاوکردنەوەى ساتى بۆردومانەکان رایگەیاند؛ هێرشمان بۆسەر بنکەیەکى سخوڕیی رژێمى زایۆنى-مان لە هەولێر کردە ئامانج.

تا ئێستا بەهۆى ئەم هێرشانەوە 17 کەس بونەتە قوربانى (کوژراو و بریندار) بەرگرى شارستانى هەولێریش دەڵێت: تا ئێستا گەڕان بەدواى تەرمى بێسەروشوێنبواندا بەردەوامە.

هاوکات مەسرور بارزانى، سەرۆکى حکومەتى هەرێمى کوردستان ئیدانەى ئەم هێرشانەى کرد و وتى: لەگەڵ کۆمەڵگەى نێودەوڵەتى لە پەیوەندیدا دەبین و داواشى کرد حکومەتى فیدراڵ بێتە دەنگ.

بڕیارە کاتژمێر 10:30 خولەک لەبەردەم بیناى نەتەوەیەکگرتوەکان گردبونەوەى جەماوەریی لە شارى هەولێر بۆ ئیدانەى ئەم هێرشانە ئەنجام بدرێت و پارێزگارى شارەکەیش دەڵێت: ئێمەش لەگەڵیان دەبین.