کەشناسی هەرێم رایگەیاند، ئەمڕۆ ئاسمان ساماڵ و سبەی شەپۆلی بەفر و باران لەسەر ناوچە جیاوازکان دەستپێدەکات.

هەواڵ:KNNC

بەڕێوەبەرایەتی گشتی کەشناسی و بومەلەرزەزانی هەرێم بڵاویکردەوە، ئەمڕۆ ئاسمان ساماڵ و پەڵە هەوردەبێت، هاوکات پلەکانی گەرما کەمێک بەرزدەبێتەوە.

سەبارەت بە کەشی سبەی چوارشەممە کەشناسی هەرێم رایگەیاند، لەکاتەکانی بەیانی تا دوای نیوەڕۆ ئاسمان ساماڵ و پەڵەهەوردەبێت، لەدوای نیوەڕۆ ئاسمان دەگۆڕێت بۆ نیمچە هەور و لە ئێوارەوە کاریگەری شەپۆلی بارانبارین بۆسەر ناوچەکان دەستپێدەکات.

دەشڵێت: کاریگەری ئەو شەپۆلە لەسەر بەشێک لە ناوچە شاخاوییەکان و هەندێک ناوچەی جیاجیا بە نمە باران و لە ناوچە سنورییەکان لە درەنگانی شەو بە بەفر بارین دەستپێدەکات.

ئاماژەی بەوەشکردوە، لە ئێوارەدا پلەکانی گەرم دوو تــــا چوار پلە نزم دەبێتەوە.

بەرزترین پلەکانی گەرمای پێشبینیکراو بە پلەی سیلیزی:
هەولێر: 19پلەى سیلیزى
سلێمانی: 17پلەى سیلیزى
دهۆک: 18 پلەى سیلیزى
کەرکوک: 21 پلەى سیلیزى
زاخۆ:  20 پلەى سیلیزى
هەڵەبجە : 18  پلەى سیلیزى
حاجی ئۆمەران: 7  پلەى سیلیزى
سۆران: 16 پلەى سیلیزى
گەرمیان: 21 پلەى سیلیزى